Dövlət İmtahan Mərkəzi ötən ali təhsil müəssisələrinin magistraturalarına qəbul imtahanı (1-ci cəhd) keçirib. Ərizələrin qəbulu internet vasitəsilə yanvarın 13 dən 27-dək aparılıb.
İmtahanda iştirak etmək üçün 21926 bakalavr ərizə təqdim edib. Onlardan 20057 nəfər Azərbaycan bölməsi, 1869 nəfər rus bölməsi üzrə imtahan verəcək. Bakalavrlardan 14017-si cari ilin, 7909-u isə əvvəlki illərin məzunlarıdır, 49 nəfər xarici ölkə vətəndaşıdır.
Modern.az xəbər verir ki, sosial şəbəkələrdə imtahanda iştirak edənlər sualların çətin olması barədə paylaşımlar ediblər.
İmtahanda düşən suallardan biri isə geniş müzakirələrə səbəb olub.
Belə ki, DİM analogiyaya aid “il-rüb; estafet-?” sualında “?” işarəsinin yerinə doğru cavab kimi “mənzil” variantını götürüb. Bu isə bakalavrlarda çaşqınlığa və narazılığa səbəb olub.
Ancaq DİM suala aydınlıq gətirib. Qurumun verdiyi izahda deyilir ki, rüb ilin, mənzil də estafetin bir hissəsidir.
Qeyd edək ki, bir çox şəxs sualın cavabını düzgün yaza bilməyib.
