Son illərdə "əsas fənn" adlandırılan Azərbaycan dili, riyaziyyat, ingilis dili, biologiya, kimya kimi fənlərin müəllimləri sertifikasiyaya cəlb edilib və ya ediləcək.
Hazırda ölkə üzrə 64901 müəllim sertifikatlaşdırma prosesinə cəlb edilib və onlardan 55510 nəfərin maaşına əlavələr olunub. Müəllimlərin maaşı onların tədris etdiyi dərs saatlarından birbaşa asılıdır.
Qeyd edək ki, hazırda sertifikatlaşdırmada yüksək nəticə göstərən müəllimlərin orta aylıq əməkhaqqı 1295 manat, digər uğur qazanan müəllimlərin maaşı isə 980 manat təşkil edir.
Diqqətin "əsas fənlər"ə yönəlməsi özlüyündə təsviri incəsənət, texnologiya, musiqi kimi fənləri tədris edən müəllimlərin biliklərinin yoxlanılmaması onların zəif tədris olunmasına yol aça bilər.
Mövzu ilə bağlı təhsil sahələri üzrə ekspert Elçin Əfəndi Modern.az-a bildirib ki, sertifikasiya imtahanı yaxın 2 ildə bütün fənlər üzrə keçiriləcək:
“2027-ci ilə qədər sertifikasiya imtahanının birinci mərhələsinin yekunlaşdırılması nəzərdə tutulur. Birinci mərhələdə bütün fənlər üzrə ən azı 1 və ya 2 şans imtahanı olacağı gözlənilir. Bundan sonra ilkin proses ümumilikdə yekunlaşacaq. Bura təsviri incəsənət, musiqi, texnologiya, eyni zamanda fiziki təbiyə və çağırışaqədərki hazırlıq kimi fənlər də daxildir. Müvafiq olaraq növbəti ildən artıq bu fənlər də prosesə cəlb olunacaq və sertifikasiya imtahanından keçəcəklər”.
Elçin Əfəndi sözlərinə görə, birmənalı olaraq məktəbdə dərs deyən bütün müəllimlər sertifikasiya imtahanında iştirak etməlidirlər. Bu səbəbdən də gələcək illərdə keçirilən imtahanların nəticələri bütün fənləri əhatə edəcək: “Sertifikasiya imtahanı ilə paralel əvvəlki illərdə diaqnostik qiymətləndirmə aparılırdı. 2026-cı ildə bütün fənlərdən də sertifikasiya imtahanı keçirildikdən sonra artıq texnologiya, təsviri incəsənət, musiqi və digər fənn müəllimlərinin də öz ixtisasları və kurikulum ilə bağlı biliklərin yerində olub-olmaması haqqında məlumatımız olacaq. Ondan sonra digər tədbirlərin alınması nəzərdə tutulur”.
Ekspert bəziləri üçün dırnaqarası baxılan bu fənlərin əslində önəmli olduğunu da vurğulayıb. “Musiqi fənni həm öz musiqi tariximizi öyrənmək, milli bağlılıq yaratmaqla yanaşı fərdlərin zövqünü də inkişaf etdirir. Həmçinin təsviri incəsənət və texnologiya fənnləri də məktəblərdə yüksək səviyyədə tədris olunmalıdır. İnformasiya texnologiyalarının inkişafı dövrümüzdə bu sahəyə olan ehtiyacı və marağı bir daha göstərir, bu səbəbdən də informatika fənni ilə yanaşı texnologiya fənninin də yüksək səviyyədə keçirilməsi lazımdır”, - o, sözlərini belə yekunlaşdırıb.
