Ölkədə müşahidə olunan qeyri-sabit hava şəraiti səbəbindən bir çox universitetlər dərsləri onlayn formata keçirmək qərarına gəlib. Eyni zamanda, bəzi dövlət qurumlarında da işlər onlayn rejimdə təşkil edilib.

Bununla belə, məktəblərdə tədrisin ənənəvi qaydada keçiriləcəyi bildirilib. Bu qərar valideynlər arasında suallar yaradıb. Sosial şəbəkələrdə paylaşım edən valideynlər məktəblərin müvəqqəti olaraq onlayn rejimə keçməli olduğunu bildiriblər. Bəzi ekspertlər hesab edirlər ki, orta məktəblərin onlayn tədris prosesinə tam hazır olmamasıdır. 

Modern.az-a danışan elm və təhsil eksperti Rizvan Fikrətoğlu bildirib ki, ölkəmizdə belə hallarla mübarizə tam qaydasında olmadığına görə müəyyən həyat şəraiti çətinləşir:

“Bu nöqteyi nəzərdən də problemlər yaşanır. Bunlardan biri də yolla bağlıdır. Yol-nəqliyyat hadisələri, xoşagəlməz hadisələr artır. Bunun qarşısını almaq üçün, həmçinin soyuq hava şəraitini nəzərə alan bir sıra universitetlər onlayn təhsilə keçid ediblər. Bu normal haldır, dünyan ölkələrinin praktikasında da var ki, adətən çıxılmaz vəziyyət olanda təhsilin hibrid, onlayn forması işə düşür”.

Ekspertin sözlərinə görə, buna məktəblərdə daha çox ehtiyac var:

“Məktəblər də heç olmasa 1-2 günlük sistemə keçid etməli idi. Məktəbin bunun üçün lazımi şəraiti olub-olmamasından asılı olmayaraq 1-2 günlük onlayn təhsilə keçmək yaxşı hal olardı. Bu həm müəllimllər, həm də şagirdlər üçün yaxşı olardı. Bizdə orta məktəblər ənənəvi tədris üsulundan istifadə edirlər. Resursun kifayət edib-etməməsindən asılı olmayaraq bir neçə günlük qapanma yaxşı olardı. Bəs onlayn dərslər üçün MÜTDA-nın resursları kifayətdirmi? Sualına cavab olaraq tam olaraq kifayət deyil deyə bilərik. Yəni Azərbaycanda 51 universitet fəaliyyət göstərir, onların bazası genişdir. Amma bu baza bütün məktəblərdə eyni səviyyədə deyil. Resursların bərabər paylanılmaması bərabər nəticə almağa gətirib çıxarmayacaq. Resurslar kifayət qədər deyil, hələ də Azərbaycanda kompüter işlədə bilməyən müəllimlər var. Baxmayaraq ki, biz rəqəmsal məktəbə keçid edirik”- R.Fikrətoğlu qeyd edib.