Azərbaycanda ötən ildən başlayaraq hərbi xidmətlə bağlı bir sıra qanunlarda dəyişiklik edilib. Çağırış yaşının 35-dən 30-a endirilməsi və təhsil alan şəxslərə müəyyən yaş limitinin qoyulması kimi dəyişikliklər bu sahədə aparılan islahatların tərkib hissəsidir.

Qeyd edək ki, ölkəmizdə ali təhsil alan və almayan şəxslərin hərbi xidmət müddəti bir-birindən fərqlidir. Belə ki, “Hərbi vəzifə və hərbi xidmət haqqında” Qanuna əsasən orta məktəbi bitirdikdən sonra birbaşa əsgərliyə gedənlər 1 il 6 ay, bakalavr pilləsində təhsil alan oğlanların əsgərlik müddəti 1 ildir. Doktarantura pilləsini bitirib elmi dərəcə alanlar isə hərbi xidmətə çağırılmır, ancaq magistratura pilləsində təhsil alanların əsgərlik müddəti ilə bakalavrı bitirib əsgərliyə gedənlər arasında heç bir fərq yoxdur. 

Modern.az-a danışan təhsil sahələri üzrə mütəxəssis Elçin Əfəndi bildirib ki, hərbi xidmətdə xidmət keçmə ilə bağlı müvafiq qanunvericilikdə bakalavr və magistr pilləsində təhsil almasından aslı olmayaraq 1 il müddətində hərbi xidmətdə olmaqları tələb olunur. Bu qanunun yaxın gələcəkdə dəyişməsi isə aktual mövzudur:

“Zaman –zaman bu mövzu ilə bağlı müəyyən müzakirələr aparılır, düşünürəm ki, qarşıdakı illərdə bununla bağlı konkret addımlar atılacaq. Magistr pilləsində təhsil alan tələbələrin əsgərlik müddətini 6 aya qədər endirmək mümkündür. O cümlədən bakalavr pilləsi üçün də qərarda dəyişiklik – həqiqi hərbi xidmətin müddətinin azaldılması ilə bağlı qərar vermək olar. Əlbəttə ki, bu qonşu ölkələrlə sülh şəraitinin olduğumuz, o cümlədən dünyada Azərbaycanı təhdid edən məsələlərin olmaması halında mümkün ola bilər və  əmin-amanlığın olduğu halda belə bir qərarın alınması daha məqsədəuyğundur, çünki hərbi xidmət məsələsi belədir ki, yeni çağırışçılar, buraxılan çağırışçıları say etibari ilə əvəz etməlidir”. 

Elçin Əfəndi sonda onu da qeyd edib ki, bu prosesin kifayət qədər müsbət tərəfləri var. Magistratura pilləsində təhsil alan tələbələr elmi-tədqiqat işlərini davam etdirmək istəyirlərsə, 6 ay hərbi xidmət keçmək onlar üçün kifayət qədər imkan yarada bilər.