Martın 2-si və 9-da ölkə üzrə buraxılış imtahanlarının keçirilməsi nəzərdə tutulub. Bu imtahanlardan sonra abituriyentlər qəbul imtahanlarına hazırlaşacaq və yay aylarında ixtisas seçimi həyata keçiriləcək. Lakin artıq indidən şagirdlər və valideynlər gələcək peşə seçimləri ilə bağlı düşünməyə başlayıblar.
Təhsil eksperti İlqar Orucov Modern.az-a bildirib ki, abituriyentlər ixtisas seçərkən özlərini gələcəkdə hansı sahədə rahat olacağına və cəmiyyətə fayda verə biləcəyinə nəzər yetirməlidirlər.
"Burada peşəkarlıq və qabilliyət rol oynayır. Bizim cəmiyyətdə, adətən ailə və ətrafın müdaxiləsi ilə ixtisas seçən şəxslər daha çoxdur. Lakin bu düzgün deyil. İş insanın gələcəyində böyük rol oynayır. Abituriyentlər reallaşdıra bilmədiyi peşələri seçəndə çox çətinliklər yaşayır", - o vurğulayıb.
İlqar Orucov qeyd edib ki, abituriyentlər ixtisas seçimi başladığı an artıq istədiyi sahəni bilməlidir: "Bəzi 11-ci sinif şagirdlərinə seçəcəyi ixtisas ilə bağlı sual verildikdə, cavabları qeyri-müəyyən olur. Bu da maneə yaradır. Burada ailə və məktəb faktoru da rol oynayır. Valideynlərlə müəllimlər vaxtında şagirdlərin istedadlarını üzə çıxarmalıdırlar. Yalnız toplanılan bala uyğun peşə seçimi etmək qüsur hesab edilir",
Təhsil eksperti gələcəkdə hansı ixtisasların daha lazımlı və gəlirli olması məsələsinə də toxunub. O deyib ki, əmək bazarında inkişaf çox sürətlidir:
"Burada rəqəmsallaşmanın və süni zəkanın inkişafı, sənaye inqilabları, iqlim dəyişiklikləri, qlobal təsirlər mühüm yer tutur. Dünyada nüfuzlu universitetlərin ixtisaslarına baxsaq, nə qədər yeni ixtisasın olduğunu görə bilərik. Son vaxtlar bizdə mühəndislik ixtisaslarına maraq artıb. Əvvəl isə, humanitar və sosial əhəmiyyətli peşələr gündəmdə idi. Dünyanın əmək bazarına çıxmaq istəyənlər daha çox dəqiq elmlərə üstünlük verirlər. Lakin, biz gələcəkdə hansı ixtisasların böyük rol oynadığını dəqiq deyə bilmərik. Çünki əmək bazarında formalaşan iş yerləri də faktordur. Sürətli inkişaf insanların təkmilləşməsini ortaya qoyacaq. Abituriyentlər qəlibləşmiş sahələri seçməklə yerli əmək bazarında özlərinə yer tapa bilərlər. Qlobal bazara çıxmaq istəyənlər peşə trendlərinə diqqət etməlidirlər".
Zərif Sofiyeva
