“Dünən keçirilən buraxılış imtahanlarının ilkin təhlili zamanı gördük ki, Azərbaycan dili və xarici dil fənnindən orta və yüksək cavablar yaza biliblər”
Bu barədə Modern.az-a açıqlamasında elm və təhsil eksperti Kamran Əsədov deyib.
Onun sözlərinə görə, abituriyentlər riyaziyyat fənnindən test tapşırıqlarını cavablandıran zaman problemlərlə qarşılaşıblar:
“Bunun bir neçə səbəbi var. Birincisi proses hələ başa çatmamış mart ayında imtahanların keçirilməsi şagirdlərin bütün diqqətini məhz imtahan prosesinə yönəltməyə mane olur. İkincisi də xarici dil fənni ilə bağlı təqdim edilmiş test tapşırığının cavablandırılmasında abituriyentlər əziyyət çəki. Azərbaycan dili fənnindən olan test sualının cavablandırılması da abituriyentlərimizə müəyyən qədər problem yaradıb. Belə ki, imtahandakı cümlələrin şagirdlər tərəfindən anlaşılmasında ciddi çətinliklər var idi. Ümumilikdə sualların çətinlik səviyyəsinə görə, imtahanda asan və orta tipli suallar ümumi test tapşırıqlarının 80%-i təşkil edirdi. Daha hazırlıqlı abituriyentləri müəyyənləşdirmək üçün 20% çətin suallar var idi. Onlar ən çox riyaziyyat fənnindən idi. Həmçinin Azərbaycan dilindən qrammatika üzrə test tapşırıqları müəyyən qədər çətinliklər törədib”.
Ekspert bildirib ki, suallar arasında mübahisəli test tapşırıqları da olub:
“Məsələn Azərbaycan dili fənnindən mübahisəli test tapşırığı təqdim edilmişdi. Mən hesab edirəm ki, bu suallar mütəxəssislərlə müzakirə olunmalıdır. Çox təəssüflər olsun ki, DİM həmişə dominant mövqedədir, yuxarıdan aşağı baxır. Qurum hesab edir ki, hər şeydə hamıdan çox bilir amma elə deyil. Azərbaycanda imtahan keçirən alternativ qurum olmadığı üçün belə hallar yaşanır. Düzdür DİM-in imtahanları şəffaf və əlçatandır, amma müəyyən qədər ədalət prinsipini pozur. Təqdim edilən test tapşırıqları daha çox ingilisdilli orta ümumi təhsil müəssisələrinin şagirdləri üçün hazırlanmış suallar idi. Məsələn Neftçalanın hansısa kəndində olan şagird bu test tapşırıqlarına cava verməyə əziyyət çəkər. İmtahan o zaman ədalətli olur ki, bütün ölkə ərazisindəki şagirdlərin ortaq bilik və bacarıqlarının suallar salınsın”.
“Bu il də maksimum nəticə əldə edənlər çox olacaq. Çox təəssüflər olsun ki, DİM imtahan suallarını süni şəkildə asanlaşdırır və çətinləşdirir. Maksimum bal toplayanların artması bir ildə Azərbaycan təhsilinin inkişaf etməsi deməkdir. Bu da süni manipulyasiyadan başqa bir şey deyil”- K.Əsədov bildirib.
