“Buraxılış imtahanı həm də ali məktəblərə qəbul imtahanlarının birinci mərhələsidir. Burada imtahan nəticələri ciddi şəkildə qəbul imtahanlarına təsiri göstərir. Bilirsiniz ki, burada maksimum bal 300-dür. Həmçinin martın 2-də və 9-da keçirilən imtahanlar ali məktəblərə V ixtisas qrupu üzrə qəbul olmağa yeganə şans verən imtahanlardır. Eyni zamanda bu imtahanların nəticələri ilə bizim 11-ci sinif şagirdlərimiz kolleclərə seçim edə biləcəklər”.
Bu barədə Modern.az-a buraxılış imtahanları ilə bağlı danışan elm və təhsil eksperti Kamran Əsədov deyib.
O qeyd edib ki, bu il ali məktəblərə qəbul olmaq istəyənlərin sayında kəskin artım var: "126 mindən artıq şəxs ali məktəblərə qəbul olmaqla bağlı ərizələrini təsdiq edib, həmçinin kolleclərə qəbul olmaq isətyənlərin sayında da biz ciddi artım müşahidə edirik".
Ekspertin sözlərinə görə, keçirilən imtahanda iştirakçıların əksəriyyəti tədris dili və xarici dildən olan suallara daha yaxşı cavab veriblər:
“Riyaziyyat fənni ilə bağlı istər martın 2-də, istərsə də 9-da keçirilən imtahanlarda iştirakçılarımız müəyyən qədər əziyyət çəkiblər. Ümumilikdə isə nəticələrin keçən ildən ciddi fərqlənməyəcəyinin proqnozunu verə bilərik. Belə ki, keçən il keçirilən imtahanlarında ümumilikdə 54 nəfər onlara təqdim edilən bütün tapşırıqlara doğru cavab verərək maksimum 300 balı toplamışdı. Builki proqnozumuz da ondan ibarətdir ki, əvvəlki ildən az olmayan sayda maksimum bal toplayan şagirdlərimiz olacaq. Bunun birinci səbəbi imtahan verən gənclərin sayının keçən illə müqayisədə çox olması, ikinci səbəb Dövlət İmtahan Mərkəzinin modelinin şagirdlər və müəllimlər tərəfindən mənimsənilməsi sual modellərinin və qiymətləndirmə meyarlarının müəllimlərimizə tanış olması ilə bağlıdır. Şagirdlərimiz test tapşırıqlarını işləmək vərdişlərinə yiyələniblər. Bu il əsasən gözləntimiz I ixtisas qrupunda mübarizənin digər qruplardan daha gərgin olacağı ilə bağlıdır. Proqnozumuz ondan ibarətdir ki, İT ixtisasları üzrə müsabiqə şərtləri biraz daha gərgin olacaq. Ümumilikdə isə imtahan nəticələri keçən illə müqayisədə ciddi şəkildə fərqlənməyəcək”.
Ekspert qeyd edib ki, bütün ixtisas qrupları eyni alətlə yoxlanıla bilməz:
“I və II ixtisas qrupuna gedən şəxslər riyaziyyatı daha yaxşı hazırlaşırlar. Bu şagirdlər daha çox texniki fənlərə meyillidilər və onlar üçün bu imtahan daha rahatdır. III ixtisas qrupu üçün də Azərbaycan dili fənni daha rahatdır. Yeganə IV ixtisas qrupunun abituriyentləri öz qruplarına aid olmayan fənlərdən imtahan verirlər. Yəni birinci mərhələdəki fənlərdən heç biri ikinci mərhələdə təkrarlanmır. Yəni IV qruplara qarşı ədalətli deyilik. Eyni zamanda kollecə getmək istəyənə, təhsilini davam etdirmək istəməyən şəxslərlə ali təhsil almaq istəyən şəxsləri eyni alətlə yoxlamağımız doğru deyil. Təhsil Haqqında Qanuna görə, Azərbaycanda icbari təhsil 9 illikdir. Əgər şəxs bunu başa vurursa, biz ona təhsili başa vurması ilə bağlı sənəd verməliyik. O gələcəkdə təhsilini davam etdirmək istəsə, bu imtahanı verməlidir. Hər kəsi imtahana salmağımız əlavə maliyyə xərcləridir, resurs itkisidir”.
