Azərbaycanda təhsil sahəsində son illər ən çox müzakirə edilən məsələlərdən biri universitet məzunlarının əmək bazarında iş tapıb-tapmamasıdır. Bəzi ali təhsil müəssisələri məzunlarına bu istiqamətdə dəstək versə də, ekspertlər ümumi vəziyyəti ürəkaçan hesab etmir.
Dövlət Məşğulluq Agentliyi tərəfindən hazırlanan “Məzunların məşğulluq reytinqi” platformasında 2018-2022-ci illər arasında Azərbaycanda fəaliyyət göstərən universitetlərin məzunlarının əmək bazarındakı yeri ilə bağlı məlumatlar dərc edilib.
Qeyd edək ki, platforma universitetlərin özləri tərəfindən təqdim edilən məlumatlar əsasında hazırlanıb. Hesablama şəxslərin məzun olduqdan sonra iki il ərzində ilk əmək müqaviləsi əsasında aparılıb.
Bundan əvvəl Bakı Dövlət Universitetinin (BDU), Azərbaycan Dövlət Neft və Sənaye Universitetinin (ADNSU), Azərbaycan Texniki Universitetinin (AzTU), Azərbaycan Dövlət Pedaqoji Universitetinin (ADPU), Azərbaycan Turizm və Menecment Universitetinin (ATMU), Sumqayıt Dövlət Universitetinin (SDU) məzunlarının məşğulluğu araşdırılıb.
Modern.az bu dəfə Bakı Slavyan Universitetinin (BSU) məzunları ilə bağlı vəziyyəti araşdıracaq.
Məlumata görə, 2018-2022-ci illərdə Universiteti 1,202 nəfər bitirib. Onların 671 nəfəri və ya 55.8 faizi iş tapa bilib. İşlə təmin olunan məzunların böyük hissəsi (575 nəfəri) qadındır. Məzunların ən çoxu 400-650 aylıq əmək haqqı verən işlərdə çalışır. Məzunların işlə təmin olunanların əsas hissəsi özəl sektordadır.
Ən çox məzunu olan ixtisas rus dili üzrə xarici dil müəllimliyidir. Belə ki, sözügedən illər ərzində BSU-nun məzunlarının 182 nəfəri bu ixtisası bitirib, onların cəmi 92 nəfər iş tapıb (50 faizdən bir qədər artıq).
Digər ixtisaslar üzrə vəziyyət aşağıdakı kimidir:
İbtidai sinif müəllimliyi - 150 məzun, onların 99-u iş tapıb
Azərbaycan dili və ədəbiyyat müəllimliyi - 146 məzun, 75-i işlə təmin olunub
Tərcümə (ingilis dili) - 70 məzundan 42-si işlə təmin olunub
Xarici dil müəllimliyi (ingilis dili) - 68 məzundan 35-i işlə təmin olunub
Məktəbəqədər təlim və tərbiyə - 68 məzundan 35-i işlə təmin olunub
Təhsildə sosial-psixoloji xidmət - 51 məzun, 37-si işlə təmin olunub
Dil və ədəbiyyat müəllimliyi (rus dili) - 49 məzun, 39-u işlə təmin olunub
Filologiya (Azərbaycan dili və ədəbiyyatı) - 45 məzun, cəmi 20-si işlə təmin olunub
Filologiya (İngilis dili və ədəbiyyatı) - 42 məzun, cəmi 16 nəfər iş tapıb.
Məzunlar əsasən müxtəlif şirkətlərlərdə, ali təhsil müəssisələrində, orta məktəblərdə və dövlət qurumlarında çalışırlar.
