“Universitetlərə qəbul prosesinə təsir edən bir neçə faktor var. Əsas faktorlardan biri də təbii ki, buraxılış imtahanlarının nəticələridir”.
Bu barədə Modern.az-a açıqlamasında elm və təhsil eksperti Elmin Nuri deyib.
Onun sözlərinə görə, builki qəbul barədə proqnoz verə bilməməyimizin səbəbi keçirilən buraxılış imtahanlarının nəticələrinin hələ açıqlanmamış olmasıdır:
“Bizə lazım olan birinci data-buraxılış imtahanlarının nəticələri hələ məlum deyil. Nə 2 mart, nə də 9 mart tarixində keçirilən imtahanların nəticələri açıqlanıb. 2 mart tarixindəki imtahanların nəticələrinin bu həftənin sonunda açıqlanacağı bildirilir. Amma hələ gözləmə mövqeyindəyik. Buraxılış imtahanının nəticələri qəbul prosesinə əhəmiyyətli dərəcədə təsir göstərir. Bəziləri buraxılış imtahanları nəticələri çıxmadan builki qəbulun necə olacağı ilə bağlı öz aləmlərində proqnoz irəli sürürlər. Mən buna sadəcə təəccüblənirəm”.
Ekspertin sözlərinə görə, ötən illərin qəbul mexanizminin bel sütununu buraxılış imtahanlarının nəticələri müəyyən etdi.
"Buraxılış imtahanları özündən sonrakı mərhələlərin aqibətini müəyyən edir. Məsələn ötən ili götürək. Ötən il buraxılış imtahanları çox yumşaq keçdi, xeyli sayda abituriyent yüksək bal topladı. 250-300 bal arasında nəticə göstərənlərin sayı rekord həddə çatdı. 300 bal toplayaraq maksimum nəticə göstərənlərin sayı 53 olmaqla heyrətləndirici rəqəmə çatdı. İnsanlar sevindilər ki, ballar çox yaxşıdır. Amma mən o zaman da demişdim ki, tələsməməliyik. Çünki qəbul prizması balans saxlamağa məcburdur. Bəllidir ki, hər il tələbə qəbulu sayı ilə bağlı müəyyən limit var. Ötən il bu 56 min idi, bu il isə 60-61 min aralığında olacaq. Yəni nə olursa olsun, universitetlərə bundan çox şəxs qəbul ola, tələbə adını qazana bilməz. Ona görə də qəbul mexanizmi balanslaşdırmaya getməlidir. Ötən il buraxılış imtahanı asan olduğu, nəticələr yüksək olduğu üçün blok imtahanları həddindən artıq çətin oldu. Buna görə ixtisas seçimi də həddən artıq rəqabətli oldu. Şəxsən mən bu işlə praktiki məşğul olduğuma görə birbaşa şahidi oldum ki, ixtisas seçimi əvvəlki il ilə müqayisədə nə dərəcədə çətinləşib. Bu məsələlər var, ona görə də biz hələlik balların artıb azalacağı ilə bağlı nəsə deməyə tələsməyək. Bunun üçün əvvəlcə buraxılış imtahanlarını nəticələrini gözləyək, bu nəticələr birinci data kimi bizə növbəti mərhələlərin mənzərəsini aydınladşırmağa kömək edəcək. Bundan sonra biz müəyyən bir fikir irəli sürə bilərik”.
“Ümumi ehtimallar əsasında belə bir fikir bildirmək istəyirəm ki, ötən il və bu il arasında rəqabət mühiti çox az fərqli olacaq. Bu il keçən ilə nisbətdə cüzi miqdarda sadəlik olacaq. Amma bu il də keçid balları artsın, güclü rəqabət olsun, mən bunu gözləmirəm. Ən azından bizdə buraxılış imtahanları verilib, imtahan suallarının o qədər də asan olmadığı üzə çıxıb. Ötən il keçid balları müəyyən ixtisaslar üzrə qalxdı. Mümkün deyil ki, ötən il 60-70 bal qalxmış bir ixtisas bu il qalxsın. Düşünürəm ki, qəbul balları ya olduğu kimi qalacaq, ya da nisbətən eniş olacaq”- E.Nuri qeyd edib.
Ekspert bildirib ki, bu il də informasiya texnologiyaları əsaslı ixtisaslarda balların artacağına yüksək ehtimal verilə bilər:
“Bu dövrün tələbidir.İxtisaslar öz yerini elə-belə tapmır, onlar üçün ayrılan plan yerləri, datalar, rəqəmlər həm də danışan mənzərədir. İT əsaslı ixtisaslı əmək bazarının tələblərinə daha çox cavab verdiyi, onlara ehtiyac daha çox olduğu üçün rəqabətlilik də bu istiqamətdə artacaq. I ixtisas qrupunun Rİ alt qrupundakı ixtisasların (İnformasiya təhlükəsizliyi, kompüter elmləri, kompüter mühəndisliyi, informasiya texnologiyaları, proseslərin avtomatlaşdırılması) ballarının artmasını gözləyə bilərik. Azalmaya gəldikdə isə bu il də əsasən pedaqoji əsaslı ixtisaslarda keçid ballarının o qədər yüksək olmayacağını deyə bilərik. Həmçinin bu siyahıya sosiologiyanı və III ixtisas qrupunda bəzi humanitar yönümlü ixtisasları (muzeyşünaslıq, arxiv, sənətşünaslıq) əlavə edə bilərik”.
