Martın 2-də XI sinif üzrə keçirilmiş buraxılış imtahanının iştirakçıları arasında 300 bal toplayan 23 məktəblinin ikisi Abşeron-Xızı Regional Təhsil İdarəsinin tabeliyindəki təhsil müəssisələrinin şagirdləridir.
Modern.az xəbər verir ki, “Azərbaycan müəllimi” ən yüksək nəticə göstərmiş həmin məktəblilərin təəssüratlarını oxucularına təqdim edir.
“Mənim üçün uğurun sirri çox oxumaq deyil, düzgün oxumaqdır”
Aişə Məmmədli Mikayıl Müşfiq adına Sumqayıt şəhər 34 nömrəli tam orta məktəbin 11-ci sinfində oxuyur. Məqsədyönlü gənc hər zaman planlı dərs oxumağa və nizam-intizamlı olmağa çalışıb. Vaxtını düzgün böldüyü üçün gününü yalnız dərs oxumaqla deyil keçirmir, maraq dairələrinə uyğun fəaliyyətlə məşğul olmağa da müvəffəq olub. Təhsil aldığı dönəmlərdə şəhər və respublika üzrə keçirilən müxtəlif intellektual yarışlarda, "Məktəblinin dostu" layihəsinin təşkil etdiyi müsabiqələrə qatılıb və iştirakçısı olduğu komanda ilə 1, 2-ci yerlərə layiq görülüb: “Mənim üçün uğurun sirri çox oxumaq deyil, düzgün oxumaqdır. Bütün fənləri həvəslə oxumuşam. Amma biologiya, ingilis dili, riyaziyyata daha çox maraq göstərmişəm. Valideynlərim isə hər zaman məni ruhlandırmağa, hər bir cəhətdən dəstək olmağa çalışıblar”.
Buraxılış imtahanı ilə bağlı təəssüratlarını bölüşən istedadlı şagird bildirir ki, imtahan zamanı həyəcanlansa da, bu, məsuliyyətdən irəli gələn bir hiss olub. Ancaq suallarla tanış olduqdan sonra həyəcanı sıfıra enib: “Yüksək bal toplayacağıma əmin idim. Maksimal nəticə göstərməyimi öyrəndiyim zaman yaşadığım hisslər əvəzolunmazdır. Gələcəkdə hər bir abituriyentə bunu yaşamağı arzu edirəm. Yüksək nəticə göstərmək məni qəbul imtahanına daha həvəslə çalışmağıma səbəb olur. Bildirmək istərdim ki, bütün müəllimlərim hər zaman mənə dəstək olub. Sinif rəhbərim Təranə müəllim daim məni ruhlandırıb. Xüsusilə biologiya müəllimim Camal Kərimovu vurğulamaq istərdim, tanıdığım gündən motivasiya qaynağım olub. Buna görə ona sonsuz təşəkkürümü bildirirəm”.
Aişə Azərbaycan Tibb Universitetinin "Tibb" ixtisasını seçməyi planlaşdırır: “Uşaqlıq arzu və istəklərim məni bu ixtisası seçməyə sövq edir. Gələcəkdə tibb ixtisası üzrə xaricdə təhsilimi davam etdirmək, yeniliklərlə tanış olmaq, peşəkar həkim olaraq xalqıma xidmət etmək istəyirəm”.
Aişə yüksək nəticə əldə etmək istəyən abituriyentlərə tövsiyə edir ki, planlı, disiplinli və məqsədli olsunlar.Vaxtlarını düzgün bölüb, dərs oxumaqla yanaşı, düzgün istirahət etməyə də çalışsınlar: “Uğur qazanmaq üçün hər şeydən imtina etmək, hər şeydən məhrum olmağa ehtiyac yoxdur. Daha öncə vurğuladığım kimi, çox oxumaq yox, düzgün oxumaq lazımdır. Bu zaman uğur sizinlə olacaq”.
“Uğurum valdeynlərimi və müəllimlərimi hədsiz sevindirir, bu məni daha da ruhlandırır”
Nuray Hüseynzadə Sumqayıt şəhər 9 nömrəli tam orta məktəbin şagirdidir. Valideynlərinin, müəllimlərinin dəstəyi, dərslərinə məsuliyyətli yanaşma, daim öz üzərində çalışma Nurayın müvəffəqiyyət əldə etməsi üçün əsas təkan olub. Seçilməyi bacaran məktəbli qız 1-ci sinifdən 11-ci sinfə qədər əlaçı olub, müəllimlərinin sevimli şagirdinə çevrilib. Nuray onu addım-addım uğura aparan anları bizimlə bölüşür: “İmtahanda sualların mənim üçün asan olduğunu gördüm. Çünki hazırlaşdığımız aylarda mən hər cür sual işləməyə çalışırdım. Cavablar çıxmamışdan öncə də maksimal nəticə göstərəcəyimə əmin idim. Bununla belə nəticələr elan olunduqdan sonra özümü çox xoşbəxt hiss etdim. Uğurum valdeynlərimi və müəllimlərimi hədsiz sevindirir, bu məni daha da ruhlandırır. Mənə hər zaman dəstək olan və dəyərli biliklər öyrədən müəllimlərimə - sinif rəhbərim Nərmin Xıxlara, fənn müəllimlərim Aydan Əliliyə, Gülnar Sadıqovaya, Sevinc Mehdiyevaya, Bəhruz Zeynalova və Yadigar Əliyevə çox minnətdaram”.
Nuray onun kimi uğur qazanmaq arzusunda olan şagirdlərə yorulmadan və həvəslə dərslərinə çalışmağı, heç bir zaman ümidsizliyə qapılmamağı məsləhət görür: “Şagirdlərə bacımın daim mənə verdiyi məsləhəti deyərdim: hər cür sualla tanış ola bilməyiniz üçün tapşırıqlarınızı yerinə yetirin”.
Riyaziyyat, fizika və informatika fənlərini daha çox sevən, fizika və informatika üzrə olimpiadalarda iştirak edən Nurayın uşaqlıqdan arzusu proqramçı olmaqdır. O, özünü inkişaf etdirərək bu sahə üzrə də ən uğurlu mütəxəssislərdən biri olmağı hədəfləyib.
