“Elmi Tədqiqat İnstitutlarının göstəricilərinin zəif, hətta sıfıra yaxın olduğu fikri həqiqəti əks etdirmir".

 

Modern.az xəbər verir ki, bu fikirləri AzEdu.az-ın “TəhsilSİZ” verilişində professor Şahlar Əsgərov səsləndirib.

 

Professorun sözlərinə görə, sosioloji tədqiqat aparılıb, insanlardan soruşulsa ki, “Sizin əmək haqqınızda, təqaüdünüzdə, məvacibinizdə elmin rolu nə qədərdir?”, çox güman ki, əksəriyyət elmin rolunu inkar edəcək, mənfi cavab verəcək. Lakin bu yanaşma qüsurludur:

 

“100 il əvvəl Azərbaycanda neft quyuları qazılmasaydı, boru kəmərləri vasitəsilə neft qərbə daşınmasaydı, biz sadəcə pambıq və üzüm satmaqla iqtisadiyyatımızı inkişaf etdirə bilməzdik. Deməli, bu gün hər birimizin aldığı məvaciblərdə elmin payı azı 60-80 faizdir. Biz xərclədiyimiz hər 100 manatın 80 manatını məhz Xoşbəxt Yusifzadə, Azad Mirzəcanzadə kimi neftçi alimlərin əməyi sayəsində qazanırıq. Elm hər zaman hər bir sahənin inkişafında aparıcı rol oynayıb.

 

Elmə hansı prizmadan baxırsansa, o da sənə görünür. Əgər bu sahəni daim mənfi yöndə təqdim etsək, nəticədə savadlı gənclik elmə deyil, ticarətə üz tutacaq. Halbuki ticarət sahəsində dəyər yaradılmır. Dəyər yalnız elmdə yaranır".

 

O, əlavə edib ki, hər doğulan 100 uşağın yalnız 3-4-ü doğrudan da elm üçün “yaradılır”:

 

"Qalan uşaqlar peşə sahələri üçün doğulurlar",- o fikrini yekunlaşdırıb.