Ali məktəblərə hazırlaşan abituriyentlərin çoxu dövlət universitetlərində qəlibləşmiş ixtisaslara müraciət edirlər. Ən çox seçilən ixtisaslara hüquq, müəllimlik, mühəndisliyin bəzi sahələri, ali məktəblərə isə Bakı Dövlət Universiteti, İqtisad Universiteti, Azərbaycan Dövlət Neft və Sənaye Universiteti kimi təhsil ocaqları daxildir. Bu cür yanaşmalar özəl universitetlərə olan inamı azaldır, üstəlik bəzi sahələrdə kadr çatışmazlığı problemleminə səbəb olur.

Təhsil məsələləri üzrə ekspert Elçin Murad bu mövzu ilə bağlı fikirlərini Modern.az saytı ilə bölüşüb.

Ekspert bildirib ki, abituriyentlərin çoxunda hələ də yeni ixtisaslara və özəl universitetlərə inam azdır. Hətta müəllimlik sahəsində yaranan şərtlər də bu sahəyə marağı azaldıb. Diplomun tanınmaması, ixtisasa tələbatın azlığı əsas problemlərdəndir. Hazırda bəzi ixtisaslar var ki, onlarda kadr çatışmazlığı problemi daha çoxdur.

O söyləyib ki, müəllimliyin informatika üzrə sahəsində bacarıqlı kadrlar çox azdır.

“Həmin ixtisası bitirənlər də sonradan riyaziyyat fənni üzrə dərs dedikləri üçün informatika hələ kölgədə qalıb. Digər sahələrdən biznesin idarə edilməsi sahəsi çox ləng inkişaf edir. Tələbələr bu sahəni praktik və dərindən mənimsəyə bilmirlər.

Elə ixtisaslar var ki, abituriyentlər həmin peşələri seçmək istəmirlər. Bura əsasən 1-ci qrup üzrə cihaz mühəndisliyi, elektrik mühəndisliyi kimi sahələr aiddir. Burada oxuyan tələbələrin çoxu balın az olma səbəbilə bu ixtisas üzrə təhsil alır”.

Elçin Murad vurğulayıb ki, texnologiyanın inkişafı bir sıra sahələrdə savadlı kadrların çoxalmasına ehtiyacı artırır. Bunlara yaşıl texnologiya sahəsi üzrə mühəndislik, otel idarəçiliyi, aşpaz və qonaqpərvərlik mütəxəssisləri, baytar həkimləri, İKT müəllimliyi, torpaq və su ehtiyatları üzrə mütəxəssislər və bağça müəllimləri aid edilir.

Zərif Sofiyeva