I, II, III və IV ixtisas qrupları üzrə ali məktəblərə qəbul imtahanının 2-ci mərhələsinin 1-ci cəhdində iştirak etmək istəyən abituriyentlər qeydiyyat başa çatıb.

Qeydiyyatdan keçənlərin statistikası aşağıdakı kimi olub:

I ixtisas qrupu: 31137 nəfər;
II ixtisas qrupu: 25957 nəfər;
III ixtisas qrupu: 28270 nəfər;
IV ixtisas qrupu: 6522 nəfər.

Statistika göstərir ki, ötən illə müqayisədə bu il bütün qruplar üzrə abituriyentlərin sayı xeyli artıb. Statistikada liderlik I qrupa məxsusdur. Son illər həmişə öndə gedən III qrup artıq ikinci sıraya düşüb.

Modern.az-a açıqlamasında təhsil eksperti Kamran Əsədov bildirib ki, keçən illə müqayisədə bu il II və III ixtisas qruplarında abituriyent sayı daha çox artıb:

“Xüsusən II qrupda abituriyentlərin sayının 25 mindən, III qrupda 28 mindən çox olması kifayət qədər rəqabətin olacağından xəbər verir. Məsələn I ixtisas qrupunda 31 min nəfərdən çox abituriyent var. Bizim proqnozumuza görə, ən gərgin müsabiqə vəziyyəti II və III qrupda olacaq. Hər iki qrupda abituriyent sayının çoxluğu ciddi şəkildə onların diqqətli olmasını qaçınılmaz edir”.

Ekspert bildirib ki, II və III ixtisas qrupunun abituriyentləri mayın 25-də birinci blok imtahanı verəcəklər:

“Onlar daha yaxşı hazırlaşmalıdırlar. Bu il III ixtisas qrupunda abituriyent sayının çox olması xüsusilə hüquq, beynəlxalq münasibətlər, dövlət və ictimai münasibətlərciddi rəqabəti qaçınılmaz edir. Məsələn I ixtisas qrupu üzrə abituriyentlər iyunun 1-də imtahan verəcəklər. Burada 30 mindən çox abituriyentin 27 mindən çoxu Azərbaycan bölməsidir. I ixtisas qrupunda daha çox informasiya texnologiyaları, informasiya təhlükəsizliyi, kompüter elmləri, kompüter mühəndisliyi ixtisaslarında rəqabət olacaq. IV ixtisas qrupunda 6 min nəfərdən çox şəxs elektron ərizəsini təsdiqləyib. Burada da Qarabağ Universitetində tibb ixtisasının açılması yüksək ballı abituriyentlərin həm də oraya getməsinə gətirib çıxaracaq. III ixtisas qrupunda rus bölməsi abituriyentləri ən az 300 balı keçməlidirlər. Çünki 2800-dən çox şəxs rus bölməsi üzrə elektron ərizəsini təsdiq edib. Məsələn beynəlxalq münasibətlər ixtisası üzrə rus bölməsinin abituriyentləri şanslı deyil. Onlar gərək yüksək bal yığsınlar. Ümumilikdə 90 mindən çox şəxs elektron ərizəsini təsdiqləyib. Bu il ən ciddi vəziyyət II və III ixtisas qruplarında olacaq”.