Azərbaycan Standartlaşdırma İnstitutu (AZSTAND) distant təhsil xidmətlərinin təşkili ilə yeni dövlət standartı qəbul edib.

AZSTAND-ın yaydığı məlumata görə, bu standart distant təhsil xidmətlərinin layihələndirilməsi, göstərilməsi, monitorinqi və qiymətləndirilməsi proseslərini əhatə edir və bu sahədə beynəlxalq normalara uyğunluğun təmin olunmasına xidmət edir.

Yeni standartın tətbiqində əsas məqsəd müasir texnologiyaların imkanlarından istifadə etməklə təhsil sistemində çevikliyi və əlçatanlığı artırmaq, eyni zamanda vətəndaşlara yerindən asılı olmayaraq keyfiyyətli təhsil almaq üçün geniş imkanlar yaratmaqdır.

Ekspertlər deyir ki, bu standartın qəbul olunması hazırda xarici ali məktəblərdən distant formada alınan diplomların avtomatik tanınacağı anlamına gəlmir. Bununla belə, Azərbaycanda fəaliyyət göstərən təhsil müəssisələri bu standart əsasında distant təhsil xidmətlərini qurmaqla beynəlxalq tələblərə uyğun fəaliyyət göstərə biləcəklər.

Standart xüsusilə əyani təhsilə davam edə bilməyən – rayonda yaşayan, xəstəliyi olan, iş həyatı ilə təhsili uzlaşdırmağa çalışan şəxslər üçün daha əlverişli təhsil imkanları yaradılmasına töhfə verəcək.

Qeyd edək ki, yeni standartın qəbul edilməsi distant təhsil formasının yaradılacağı ilə bağlı müzakirələri yenidən gündəmə gətirib.

Modern.az-a açıqlamasında Milli Məclisin Elm və təhsil komitəsinin sədri Anar İsgəndərov bildirib ki, Azərbaycan distant təhsilə keçəcək:

“COVİD19-la bağlı hadisələr göstərdi ki, dünyada distant təhsilə ehtiyac var. Azərbaycan da dünyanın tərkib hissəsidir və təbii ki, biz də ona keçməliyik, keçəcəyik də. Distant təhsilin,təbii ki, əhəmiyyəti bilinir. “Ali təhsil haqqında” qanun qəbul olunarkən distant təhsil də onun tərkib hissəsidir.  Amma məsələ müzakirə olunsun və gecikdirilsin, belə bir şey yoxdur. Əminəm ki, “Ali təhsil haqqında” qanunun  qəbulu ilə distant təhsillə bağlı arzu-istəklərimiz və reallıqlar orada öz əksini tapacaq. Bir daha deyirəm ki, təhsil sahəsində də Azərbaycan dünyanın bir hissəsi olduğu üçün biz də onu qəbul edəcəyik. Amma "Ali təhsil haqqında" qanunun layihəsi üzərində iş gedir, bu işlər başa çatandan sonra onun müzakirəsi təbii ki, keçiriləcək. Bundan sonra siz distant təhsillə bağlı olan müddəalarla tanış ola bilərsiniz”.

Komitə sədri qanun layihəsinin nə zaman qəbul olunacağı məsələsinə də aydınlıq gətirib:

“Qanunun qəbulunu qarşımıza məqsəd qoyuşuq. Amma biz istəyirik ki, elə qanun qüvvəyə minsin ki, Azərbaycan dövlətinin və təhsilinin maraqlarını təmin etsin. Yəni qanun qəbul olunandan sonra haradasa, əlavə, düzəlişləri az olsun. Təbii ki, hər hansı qanun qəbul olunandan sonra dünyanın hər yerində qanunlara əlavə və düzəlişlər olub. Amma ona qədər hamı çalışır ki, qanun mükəmməl olsun. Biz də təbii ki, bunun üzərində işləyirik. Amma qanunu nə zaman qəbul olunacağı, müzakirəyə çıxarılması qanun layihəsi hazır olmamış danışmaq düzgün deyil. Biz reallıqdan çıxış edərək təbii ki, ali təhsillə bağlı müddəalar kifayət qədərdir”.