Mayın 1-dən 2025–2026-cı tədris ili üzrə ümumi təhsil müəssisələrinin birinci siniflərinə şagird qəbuluna start verilib. Qəbul prosesi Təhsil Nazirliyinin www.mektebeqebul.edu.az portalı vasitəsilə elektron qaydada həyata keçirilir.
Elektron qeydiyyat sistemi ölkənin bütün şəhər və rayonlarını əhatə edir. Ənənəyə uyğun olaraq, valideynlər portal üzərindən övladlarını qeydiyyatdan keçirərkən dərs deyəcək ibtidai sinif müəllimini də seçə bilirlər.
Müəllimlərin adları ilə yanaşı, onların sertifikasiya imtahanlarında topladığı balların da sistemdə göstərilməsi təklif edilib.
Təhsil məsələləri üzrə ekspert Elçin Əfəndi Modern.az-a bildirib ki, bu addım valideynlərin seçim prosesində daha obyektiv və məlumatlı qərar verməsinə kömək edə bilər:
“Bəzi hallarda valideynlər övladını məktəbə yerləşdirən zaman müəllimin göstəriciləri ilə bağlı informasiya sahibi olmur. Sadəcə ağızdan eşitdikləri məlumatlar hesabına bu prosesi həyata keçirirlər. Amma faktiki olaraq göstəricilər bazada öz əksini taparsa, valideyn də baxaraq seçim edə biləcək”.
Ekspertə görə, bu yanaşma şayiə və dedi-qodulara əsaslanan qərarların qarşısını almağa kömək edəcək:
“Valideyn eşitdiyi dedi-qodulardakı müəllimin göstəricilərinin digərindən daha zəif olduğu halda bunu da görə biləcək. Bu, valideynlərin daha düzgün qərar verməsinə gətirib çıxaracaq məqam olduğu üçün müsbət yanaşmaq olar”.
Elçin Əfəndi bildirir ki, bəzi şəxslər müəllimlərin nəticələrinin valideynlərə təqdim edilməsini narahatlıq doğuracaq məsələ kimi qiymətləndirə bilər. Lakin o, bu fikirlə razılaşmır:
“Düşünmürəm ki, belə bir hal olsun. Ən azından valideynlər düzgün qərar qəbul etməlidirlər. Burada müəllimlərin valideynlərə özlərini təqdim etmələri baxımından da imkan yaranır. Sistemdə qeydiyyatdan keçərkən müəllimin nəticələrinin görünməsi mənə görə doğru addım olar”.
