Dövlət İmtahan Mərkəzi 2024-cü il üzrə Bakı şəhəri üzrə orta məktəb məzunlarının statistik göstəricilərini açıqlayıb. Tələbə qəbulunda 700 ballıq sistem tətbiq edildiyini nəzərə alsaq, 300 bal bu sistem üzrə 42.86% təşkil edir. Statistikaya görə, abituriyentlərin 53.89%-i 300 bala qədər nəticə göstərib. Bəzi ekspertlər düşünür ki, paytaxtda belə nəticənin olması regionlarda daha aşağı nəticə əldə olunması deməkdir.
Modern.az-a danışan elm və təhsil eksperti Elmin Nuri bildirib ki, bu məsələdə biraz fərqli düşünmək lazımdır:
“Şagirdin uğur göstəricilərini paytaxta və regiona, şəhərə və kəndə yönəlik ayırmaq olmaz. Təbii ki, alternativ cavab verilə bilər ki, şəhərdəki şərait və imkan fərqlidir, buradakı şagirdlərin avantajları daha çoxdur. Bunlarla razıyıq, amma Dövlət İmtahan Mərkəzinin hər il təqdim etdiyi elmi-statistik təhlillərdə istər 9-cu, istərsə də 11-ci siniflərin buraxılış imtahanlarının nəticələrinin müxtəlif aspektlərdən dəyərləndirməsinə görə, bir çox regionlar Bakını qabaqlayır. Məsələn buraxılış imtahanından 300 bala yaxın nəticə göstərənlərin, fənnlər üzrə ayrılıqda statistikalar aparılır. Əmin ola bilərsiniz ki, region məktəbləri Bakı məktəblərini üstələyirlər. Burada əsas göstəricini məktəb özü müəyyənləşdirir”.
Ekspertin sözlərinə görə, burada əsas göstəriciləri müxtəlif regionlarda, İsmayıllıda, Naxçıvanda, Tovuzda, Sumqayıtda, Qubadlıda və digər regionlardakı məktəblər formalaşdırır:
“İndi biz bu göstəricilərə görə deyə bilmərik ki, paytaxtın, yaxud hansısa iri şəhərin göstəricisi zəifdir. Burada məsələnin pərdə arxasında qalan tərəfləri var. Bakı Şəhəri üzrə Təhsil İdarəsinin tabeliyində olan və Bakıda fəaliyyət göstərib BŞTİ-yə daxil olmayan məktəblər ayrıdır. Əlbəttə ki, Bakıda fəaliyyət göstərən özəl liseylərin, özəl məktəblərin nəticələri regionlardan heç də zəif olmayacaq, üstün olacaq. Biz bunu hər il görürük. Yəni reytinq göstəriciləri şəhərlər arasında olsa, təbii ki, paytaxt Bakı birinci yer tutar. Burada sadəcə BŞTİ-nin tabeliyində olan məktəblərdən söhbət gedir”.
E.Nuri sonda qeyd edib ki, bu gün regionlardakı təhsil göstəriciləri ilə Bakıdakı göstəricilər arasında ciddi fərq yoxdur:
“Müəyyən yerlərdə məktəblər ola bilər ki, şəraiti, infrastrukturu Bakı ilə yaxud digər iri şəhərlərlə müqayisəyə gəlməz. Amma region təhsilini və tədrisdəki şəraiti nəzərə alsaq paytaxt Bakıdan çox da fərqlənmirlər”.
