“Əvvəlki illərdə rus bölməsi üzrə müəllimlərin sertifikasiya imtahanlarında qarşılaşdığı əsas narazılıqlardan biri sualların həm məzmun, həm də terminoloji baxımdan Azərbaycan bölməsi ilə müqayisədə daha çətin olması idi”.

Bunu Modern.az-a açıqlamasında elm və təhsil eksperti Kamran Əsədov deyib.

Ekspert bildirib ki, müəllimlər bu çətinliyi bir neçə aspektdən əsaslandırırdılar: tərcümə olunmuş testlərin keyfiyyətsizliyi, mətn və tapşırıqların strukturunun rus dilində tədris mühitinə uyğunlaşdırılmaması, kurikulum və pedaqoji üsulların azərbaycanlaşdırılmış variantları əsasında hazırlanması, yəni real tədris təcrübəsi ilə uyğunsuzluq: "Bu səbəbdən rus bölməsində çalışan müəllimlər haqlı olaraq deyirdilər ki, həm testlərin texniki dili, həm də didaktik çətinlik səviyyəsi onların nəticələrinə mənfi təsir edir".

Onun sözlərinə görə, 2024-cü ildə keçirilən imtahanlardan sonra bu fərqlərin ictimailəşdirilməsi və müəllimlərin aktiv şəkildə sosial mediada, eləcə də Təhsil İnstitutuna yönəlik sorğular vasitəsilə etirazları müəyyən təsir doğurdu:

“Elm və Təhsil Nazirliyi də etiraf etdi ki, bölmələrarası fərqlər var və bunun aradan qaldırılması istiqamətində iş aparılacaq. 2025-ci ildə gözləntilər daha balanslı və vahid meyarlar əsasında hazırlanmış suallardır. İlk olaraq qeyd edək ki, bu il sualların hazırlanmasında Təhsil İnstitutunun yanında rus bölməsi üzrə ixtisaslaşmış ekspertlərin cəlb olunması prosesi genişləndirilib. Məqsəd – sualların yalnız tərcümə yox, rus dilində tədrisin spesifikasına uyğun tərtib olunmasıdır. Məsələn, pedaqogika və metodika bölməsində istifadə olunan terminlərin birbaşa Azərbaycan dilindən çevrilməsinin qarşısı alınmağa çalışılıb. Eyni zamanda rus bölməsi müəllimləri üçün xüsusi demo testlər və izahlı nümunələr təqdim olunub ki, bu da onların əvvəlcədən imtahan formatına hazırlıqlı olmasını təmin etməlidir.Bununla belə, hələ də müəyyən narahatlıqlar qalır. Xüsusilə regionlarda rus bölməsində tədris edən müəllimlərin çoxunun metodik hazırlığı və imtahan formatı ilə bağlı resurslara çıxışı məhduddur. Əgər bu il də suallar real dərs şəraitindən uzaq, yalnız nəzəri biliklərə əsaslanacaqsa, yenidən haqlı narazılıqlar yarana bilər”.

Ekspert bildirib ki, hazırda Azərbaycanda ümumi təhsil müəssisələrinin 10%-dən azında rus bölməsi mövcuddur və bu bölmələrdə müəllim hazırlığı sistematik aparılmır:

“Nəticədə həmin müəllimlər üçün testlər təkcə qiymətləndirmə yox, həm də sistemin özünün onlara münasibətini göstərən indikator kimi çıxış edir. Bu baxımdan bu il keçiriləcək imtahanın nəticələri yalnız fərdi qiymətləndirmə yox, həm də təhsil siyasətinin inklüzivlik və ədalətlilik meyarları ilə nə dərəcədə uyğunlaşdığını göstərəcək. Yekun olaraq, bu il rus bölməsi müəllimlərinin gözləntisi odur ki, suallar daha şəffaf, bölməyə uyğunlaşdırılmış və pedaqoji reallıqlara yaxın olacaq. Əgər bu təmin olunarsa, nəticələr daha obyektiv, narazılıqlar isə az olacaq. Əks təqdirdə isə, rus bölməsində çalışan müəllimlərin dövlət sisteminə olan etibarı daha da zəifləyə bilər”.