Millət vəkili Zahid Oruc baş nazir Artur Rasizadə ilə görüşüb. Bunu Modern.az-a açıqlamasında millət vəkilinin özü məlumat verib.
Millət vəkili görüş zamanı təmsil etdiyi bölgənin-Bərdə rayonunun mühüm bir probleminin həllini baş nazirdən xahiş edib. Z.Orucun dediyinə görə, söhbət Tər-tər çayının keçdiyi Yeni Əyricə kəndi ərazisindəki körpü ilə bağlı yaranan və uzun müddətdən bəri davam edən problemin həllindən gedir:
“Qəzalı durumda olan həmin körpü yalnız Sovet dövründə normal-işlək vəziyyətdə olub və bir neçə müddətdir ki, həm nəqliyyat vasitələrinin, həm də minlərlə insanın istifadə etdiyi bu körpü tamam yararsız duruma düşüb. Odur ki, görüş zamanı bununla bağlı məsələni Nazirlər Kabineti rəhbərinin nəzərinə çatdırdım.
Bu yerdə xüsusilə onu vurğulamaq istəyirəm ki, bundan əvvəlki dönəmdə də cənab Artur Rasizadə Bərdənin problemlərinin həllinə çox yaxından ilgi göstərib, onlarla kəndin mavi yanacaqla təmin olunmasından tutmuş, oradakı suvarma sistemlərinin quruculuğuna və sairə qədər hamısına real qərarlarla təsir göstərib.
Bu mənada tam əminliklə söyləmək olar ki, sözügedən problem də onun göstərişi, tapşırığı ilə öz həllini tapacaq və bu ərazidəki insanlar da məhz bunu bizdən gözləyirlər”.
Modern.az
