Azərbaycan elmi ictimaiyyətinin və beynəlxalq riyaziyyat elminin tanınmış simalarından biri, fizika-riyaziyyat elmləri doktoru, professor Məsud Əfəndiyev Azərbaycan Memarlıq və İnşaat Universitetində (AzMİU) rektorun müşaviri vəzifəsinə təyin olunub.
Bu barədə Modern.az-a universitetin mətbuat xidmətindən məlumat verilib.
"Bu təyinat ölkənin aparıcı mühəndis və memarlıq ali təhsil müəssisəsində akademik mühitin gücləndirilməsi, elmi-tədqiqat fəaliyyətlərinin beynəlxalq standartlara uyğunlaşdırılması və universitetin qlobal elmi şəbəkələrə inteqrasiyası baxımından mühüm əhəmiyyət daşıyır", - məlumatda deyilir.
Professor Məsud Əfəndiyev Dünya Azərbaycanlı Alimlər Birliyinin İdarə Heyətinin sədri olmaqla bərabər zəngin elmi fəaliyyəti, beynəlxalq miqyasda qazandığı nüfuz və akademik liderliyi ilə seçilir. O, Azərbaycan Dövlət Universitetində (indiki Bakı Dövlət Universiteti) və Moskva Dövlət Universitetində təhsil alıb, Almaniyanın Münhen, Ştutqart və Berlin universitetlərində dərs deyib, Münhendə yerləşən nüfuzlu “Helmholtz” Elmi-Tədqiqat Mərkəzində uzun illər “Dinamik sistemlər” şöbəsinin rəhbəri kimi fəaliyyət göstərib. Hazırda dünyanın aparıcı universitetlərində, o cümlədən Stanford, CalTech, Waseda, UofT, Waterloo, Şanxay, Sidney, Münhen Texniki Universitetlərində, eləcə də Riyaziyyatın “Məkkəsi” sayılan və Kanadanın Toronto şəhərində yerləşən Fields İnstitutunda “Distinguished Visiting Professor” statusunda fəaliyyət göstərir və tematik proqramlara rəhbərlik edir. Məlumat üçün bildirək ki, ABŞ-nin və Kanadanın aparıcı universitetlərinə “Distinguished Visiting Professor” statusunda bir qayda olaraq Nobel mükafatı laureatları və öz sahələrində fundamental nəticələr qazanmış alimlər dəvət olunurlar.
Onun elmi irsinə 180-dən çox beynəlxalq məqalə, dünyanın mötəbər nəşriyyatlarında çap olunmuş 8 kitab və yüksək indeksli jurnallarda nəşr edilmiş tədqiqatlar daxildir.
Məsud Əfəndiyev dünyanın bir sıra qabaqcıl elmi qurumlarının mükafatlarına – o cümlədən “Aleksander fon Humboldt” (Almaniya), “Japan Society for the Promotion of Science” (Yaponiya), “Otto Monsted” (Danimarka) və Kanadadakı Fields İnstitutunun ömürlük mükafatı kimi nüfuzlu təltiflərə layiq görülüb.
O, həmçinin Azərbaycan Prezidenti İlham Əliyevin sərəncamı ilə "Əməkdar elm xadimi" fəxri adına layiq görülüb.
