Tələbələrlə rəhbərlik arasında ünsiyyət imkanlarının artdığı dövrdə rektorların sosial şəbəkələrdəki aktivliyi də aktuallaşır. Lakin bəzi hallarda tələbələr öz universitetlərinin rektorunun virtual məkanda mövcud olub-olmadığını belə bilmirlər.
Modern.az xəbər verir ki, AzEdu.az təhsil portalı ali təhsil müəssisələrinin rəhbərlərinin sosial şəbəkə fəallığını araşdırıb:
Kimlər “online”dır, kimlər “offline” qalıb, bəziləri isə ümumiyyətlə heç vaxt “login” belə olmayıb?
Bakı Ali Neft Məktəbinin (BANM) rektoru Elmar Qasımov və Qarabağ Universitetinin rektoru Şahin Bayramov, "Facebook", "Instagram", "X" (keçmiş Twitter) və "LinkedIn" kimi əsas sosial platformalarda aktiv olan rektorlar sırasındadır. Onlar paylaşımları ilə həm universitetin fəaliyyətini işıqlandırır, həm də təhsil ictimaiyyəti ilə açıq əlaqə qururlar.
Azərbaycan Dövlət İqtisad Universitetinin (UNEC) rektoru Ədalət Muradov da "Facebook", "Instagram" və "X" platformalarında aktivdir. Lakin o, "LinkedIn" şəbəkəsində istifadə etmir.
Bakı Dövlət Universitetinin (BDU) rektoru Elçin Babayev "X" platformasında aktivlik nümayiş etdirən rektorlardandır. Onun "Facebook" hesabı mövcud olsa da, heç bir paylaşım etmədiyi müşahidə olunur. Rektorun "LinkedIn" və "Instagram" platformalarında isə adına rast gəlinmir.
Bakı Slavyan Universitetinin (BSU) rektoru Anar Nağıyev və Azərbaycan Tibb Universitetinin (ATU) rektoru Gəray Gəraybəyli isə yalnız "Facebook" sosial şəbəkəsində aktivlik nümayiş etdirirlər. Onlar "Instagram", "X" və "LinkedIn" kimi digər platformalardan istifadə etmirlər.
Azərbaycan Dövlət Neft və Sənaye Universitetinin (ADNSU) rektoru Rüfət Əzizov və Bakı Avrasiya Universitetinin (BAAU) rektoru Səyavuş Qasımov, əsasən "Facebook" və "Instagram" sosial şəbəkələrində aktiv istifadəçilərdir. Lakin onları "X" (keçmiş Twitter) və "LinkedIn" platformalarında görmək mümkün deyil.
Sumqayıt Dövlət Universitetinin (SDU) rektoru Əminağa Sadıqov isə yalnız "Facebook" şəbəkəsində aktivdir. "Instagram" və digər platformalarda fəaliyyəti müşahidə olunmur.
Azərbaycan Memarlıq və İnşaat Universitetinin (AzMİU) rektoru Gülçöhrə Məmmədova "Facebook" şəbəkəsində aktivdir. "X" platformasında da hesabı mövcuddur, lakin burada fəal paylaşım etmir. Onun "Instagram" və "LinkedIn" sosial şəbəkələrindən istifadə etmədiyi görünür.
Azərbaycan Texniki Universitetinin (AzTU) rektoru Vilayət Vəliyev, əksinə olaraq, "LinkedIn" və "X" platformalarında aktivlik göstərir, lakin "Facebook" hesabından nadir hallarda istifadə edir. Rektorun "Instagram" şəbəkəsində isə heç bir fəaliyyəti yoxdur.
Azərbaycan Diplomatik Akademiyasının (ADA) rektoru Hafiz Paşayev, Azərbaycan Dillər Universitetinin (ADU) rektoru Kamal Abdulla, Azərbaycan Dövlət Pedaqoji Universitetinin (ADPU) rektoru Cəfər Cəfərov, Bakı Mühəndislik Universitetinin (BMU) rektoru Yaqub Piriyev, Azərbaycan Universitetinin (AU) rektoru Səadət Əliyeva və Lənkəran Dövlət Universitetinin (LDU) rektoru Natiq İbrahimov sosial şəbəkələrdə tamamilə qeyri-aktiv olan rektorlardandır.
Adıçəkilən şəxslərin "Facebook", "Instagram", "X" və "LinkedIn" kimi platformalarda hesablarına rast gəlmədik. Onların bu platformalarda hər hansı hesab yaratdığı və ya istifadə etdiyi məlum deyil.
