Qarşıda duran əsas problemlərdən biri Xəzər dənizinin suyunun çəkilməsidir.
Modern.az xəbər verir ki, bunu deputat Fazil Mustafa Milli Məclisin bugünkü plenar iclasında çıxışı zamanı bildirib.
“Bu prosesin bir müsbət tərəfi odur ki, süni torpaq sahələri yaranır və bundan səmərəli istifadə imkanı ortaya çıxır. Lakin Urmiya gölündə baş verən faciə gözümüzün önündədir. Bu fəlakətin Xəzərə də gəlib çatmayacağını düşünməməliyik. Bölgə dövlətləri ilə birgə bu məsələni strateji prioritet kimi götürməli və ciddi addımlar atmalıyıq”, – deyə deputat vurğulayıb.
Fazil Mustafa həmçinin qeyd edib ki, təkcə suyun çəkilməsi yox, təhsilin də “geri çəkilməsi” müşahidə olunur:
“Bir müddət əvvəl 5, 7, 8 və 9-cu siniflər üzrə lisey və gimnaziyalara şagird qəbulu dayandırıldı. Bu qərar əgər 8 ay əvvəl qəbul olunsaydı, problemlər yaşanmazdı. İctimai etirazlardan sonra qərar ləğv edildi. Bu isə arzuolunan hal deyil. Təhsildə ciddiliyi artırmalıyıq. Təcrübələr və qərarlar özünü doğrultmur. Hər şeyi 20 il əvvəlki səhvlərlə əsaslandırmaq olmaz”.
