Təhsildə Keyfiyyət Təminatı Agentliyi Ukraynada magistr təhsili almış Azərbaycan vətəndaşının diplomunu tanımayıb.

Modern.az-ın məlumatına görə, o, Agentliyin qərarından məhkəməyə şikayət edib.

İddiaı Ukraynanın Yaroslav Mudri adına Milli Hüquq Universitetinin “Beynəlxalq hüquq” ixtisası üzrə magistr təhsilini bitirdiyini və diplom aldığını bildirib. O, dərslərdə onlayn formada iştirak etdiyini, imtahanlardan keçdiyini və diplom işini uğurla müdafiə etdiyini əsas gətirərək, Agentlikdən bu diplomun tanınmasını tələb edib.

Lakin Agentlik iddiaçının təhsil aldığı müddətdə Ukrayna ərazisində tədrisin normativ tələblərinə uyğun fiziki iştirak etmədiyini, yəni ən azı üçdə iki hissəsində ənənəvi formada dərslərdə iştirak etmədiyini əsas gətirərək onun müraciətinə imtina cavabı verib.

İddiaçı isə Ukraynada müharibə şəraiti olduğunu, bu səbəbdən ölkədə fiziki olaraq təhsildə iştirak edə bilmədiyini vurğulayıb və bunu üzrlü səbəb kimi göstərib. O, hətta Xarici İşlər Nazirliyinin vətəndaşlara Ukraynada təhlükəsiz yerlərdə qalmaqla bağlı tövsiyələrini də məhkəməyə təqdim edib.

Buna baxmayaraq, məhkəmə hesab edib ki, iddiaçı universitetə qəbul olan zaman Ukraynadakı təhlükəli vəziyyətdən xəbərdar idi və bu şəraitdə qiyabi formada ənənəvi təhsil almaq mümkün olmadığını bilirdi. Məhkəmənin qənaətinə görə, bu səbəb iddiaçının distant formada təhsil almasını üzrlü hal kimi əsaslandırmır və ona diplomun tanınması hüququ vermir.

Məhkəmə Təhsildə Keyfiyyət Təminatı Agentliyinin qərarını qanuni sayaraq iddianı təmin etməyib.

Elnur Əmirov