Meydançanın yanındakı çardaq sökülüb, ərazini maşın dayanacağı etmək istəyirlər
Bakı şəhəri Xətai rayonu Nəsrəddin Tusi küçəsinin sakinləri iyunun 16-da maraqlı hadisə ilə üzləşiblər. Sakinlər Modern.az-a bildiriblər ki, Tusi-21 ünvanda yerləşən həyətdə idman meydançasında quraşdırılmış dəmir oturaqcaqlar, yelləncəklər və köşk (çardaq) qaynaqla kəsilərək yerə atılıb. Qeyri-iş günü olmasına baxmayaraq əraziyə baxan 88 saylı MİS-in işçiləri ərazidə təmizlik aparırdılar. Bu, sakinlərdə şübhə yaradıb. Əraziyə toplaşan sakinlərin araşdırmasına görə, idman meydançasının yeri maşın dayanacağı yaratmaq istəyən naməlum iş adamının güdazına geidb. Dəmir çardağı da o sökdürüb. Küçənin sakini Zakir Hüseynov deyib ki, çardağı söküblər ki, sakinlər buna öyrəşsin, sonra sakinlərin istirahət yeri olan idman meydançası avtomobil dayanacağına çevrilsin: “Bu barədə lazımi orqanlara müraciət edəcəyik. Əgər bu işdə 88 saylı MİS-in əli varsa, yuxarı instansiyalara müraciət edəcəyik. Belə özbaşınalıq olmaz! Bu balaca yer sakinlərin yeganə istirahət yeridir. Bunu da əlimizdən alıb iş adamlarına satmaq istəyirlər”.
