Əvvəlki illərdə buraxılış imtahanından “2” alanlar orta məktəbi bitirməmiş sayılırdılar. Onlar ali məktəbə sənəd vermək üçün növbəti il yenidən “qeyri-kafi” qiymət aldıqları fəndən imtahan verməli olurdular. Lakin ötən il qəbul olunmuş qərara görə, buraxılış imtahanından “2” qiymət alan şagirdlər də artıq ali və orta ixtisas müəssisələrinə sənəd verə bilirlər. Müvafiq qərar bu il də sənəd qəbulu zamanı tətbiq olunur.
Təhsil eksperti Şahlar Əsgərov da şagirdlərə belə şansın verilməsini alqışlayır:
“Azərbaycan gəncinin attestat imtahanından “2”, “5” qiyməti almasından asılı olmayaraq, ali məktəbdə oxumasının nə ziyanı var? Əgər dövlət istənilən gəncə şans verirsə ki, o təhsil səviyyəsini qaldırsın, bunu alqışlayın, buna afərin deyin. Çünki indi ali məktəbi qurtaran insanlara təyinat verilmir. İnsan özü-özünü işlə təmin edir. Sovet dövlətində ona görə “2” alanları qəbul etmirdilər ki, onu işlə təmin etmək çətin olacaqdı. Amma indi bu çətinlik yoxdur. Bu səbəbdən nazirlik istənilən kəsə (“2” alıbsa da), ona ali məktəbə sənəd vermək hüququ tanıyırsa, mən bunu alqışlayıram. Fərz edək ki, şagird riyaziyyatdan “2” alıb. Əlbəttə ki, bu biabırçılıqdır, amma bəlkə o yaxşı jurnalist olacaq. Heç riyaziyyatdan imtahan ona lazım olmayacaq. Və yaxud da şagird tarixdən iki alıb, bəlkə bu gözəl riyaziyyatçı olacaq. Ona görə bu yeniliyi məhəbbətlə qarşılayın. Qoy, gənc 5-6 il ali məktəbə gəlib getsin. O küçədə qalsa, tamamilə korlanıb gedə bilər. İndi təhsil modeli küçədə qalmaq şansı olan adamı ali məktəbə gətirir”.
Misranə Həsənzadə
