1. Ölüm-dirim
Hamı ümid edir ki, bu dirilər haçansa dirilər
Canlı olmaqdan bezib diri olmağa qaçır ölülər...
Özlərini daha diri görüb dirilərə gülər ölülər
- Allah sizə rəhmət eləsin dirilər,
- Sizi min yaşayasız, ölülər
2. Qadın – kişi
Ərinin təpiyini gizlətdiyi qədər KİŞİ olur qadınlar...
Arvadına vurduğu təpik qədər qadınlaşır kişilər...
Kişiləşir qadınlar, arvadlaşır kişilər....
ər hər təpiyində qadında kişiliyi artırır
qadın hər yediyi təpikdə kişini arvadlaşdırır
- Adam kişi olar , ay kişi!
- Arvad – arvad danışma, ay arvad!
3. Kənd-şəhər
Kəndin cılız işığına yığışan camaat o işıqda şəhərə qaçardılar.
Şəhərin gur işığında yığışan camaat kəndləri üçün darıxardılar
Biri şəhərdən kəndə işıq aparardı, o biri kənddən şəhərə qaranlıq...
Beləcə yavaş-yavaş işıqlanırdı kəndlər, yavaş -yavaş qaranlıq olurdu şəhərlər...
Və bir gün vəziyyət elə gətirdi ki, şəhərdən gəlib kənddən borca işıq aldılar....
- İşıqdan olmayasan a kənd!
- İşıqlıqda olasan a şəhər....
4. İt - pişik
İt pişiyi qovanda tumarlanır, pişik itdən qaçanda qudurur...
Bu yerlərdə it nədir, pişik nə ?
Bu yerlərdə:
İtlər bir az kişilərlə dostdur, pişiklər bir az qadınlarla
Bu yerlərdə :
İtlər bir az kişilənmək istər, kişilər isə bir az hürmək
Pişiklər bir az nəvaziş istər, qadınlar bir az sığallanmaq.
Qadın nəvazişində kişi hürüşü
Pişik sığalında it kişiliyi nə qədər gülünc!
Həəə... bu yerlərdə bir zamanlar
Qadınlar kişiləri, pişiklər isə itləri qovacaq...
Bu yerlərdə bir zamanlar qadınlar kişiləri, pişiklər itləri qovanda qaçış zolağında yerə düşən nəvazişi qucağına götürüb qaçanlara doğru bir cüt uşaq çığıracaq
- Qaçma, ay it oğlu it
- qovma ay pişik qızı
