“Kamil Vətəndaş” Maarifləndirmə Mərkəzinin rəhbəri Həsən Hüseynlinin işi üzrə Gəncənin Nizami Rayon Məhkəməsində keçirilən məhkəmə prosesi iyulun 14-də yekunlaşıb.
“Media forum” saytı xəbər verir ki, Həsən Hüseynli 6 il müddətinə azadlıqdan məhrum edilib və məhkəmə zalında həbs olunub.
İyulun 4-də dövlət ittihamçısı Həsən Hüseynliyə 7 il həbs verilməsini istəmişdi.
Həsən Hüseynli silah tətbiq etməklə xuliqanlıq və qanunsuz olaraq soyuq silah gəzdirmə ittihamı ilə həbns edilib. İstintaqın iddiasına görə, QHT rəhbəri bu il martın 31-də Gəncə sakini Arzu Qəhrəmanovu bıçaqla yaralayıb.
Həsən Hüseynli 1957-ci ildə Gəncə şəhərində doğulub. 1978-ci ildə indiki Bakı Dövlət Universitetinin fizika fakültəsini bitirib.
1978-1981-ci illərdə Lənkəranda orta məktəbdə fizika müəllimi, 1982-1984-cü illərdə Gəncədəki büllur fabrikində mühəndis işləyib. 1985-1987-ci illərdə Moskva Elektron Texnikası İnstitutunda elmi fəaliyyətlə məşğul olub, 1988-ci ildə bu institutda elmi iş müdafiə edərək fizika-riyaziyyat elmləri namizədi dərəcəsinə yiyələnib. 1989-1992-ci illərdə Gəncədə Azərbaycan Kənd Təsərrüfatı Akademiyasında laboratoriya müdiri, müəllim işləyib.
1990-1992-ci illərdə həmçinin jurnalist kimi fəaliyyət göstərib, Gəncədə çıxan “Vətən” qəzetində çalışıb. 1992-1993-cü illərdə Azərbaycan Respublikası Prezidentinin Aparatında baş məsləhətçi olub.
1997-1998-ci illərdə Bakıda Açıq Cəmiyyət İnstitutu Yardım Fondu - Soros Fondunda çalışıb, təhsil proqramına koordinatorluq edib. 1998-2004-cü illərdə Gəncə Təhsil Məlumat Mərkəzinin rəhbəri olub. 2004-2009-cu illərdə Gəncə Açıq Cəmiyyət Təşəbbüsləri Mərkəzinə rəhbərlik edib.
2009-cu ildən Gəncədə fəaliyyət göstərən “Kamil Vətəndaş” Maarifləndirmə Mərkəzi İctimai Birliyinin rəhbəridir.
Fizika üzrə elmi məqalələrin, təhsil problemləri haqda yazıların və 2 kitabın müəllifidir.
Ailəlidir, iki övladı var.
Heç bir siyasi partiyanın üzvü deyil.
Həsən Hüseynlinin rəhbərlik etdiyi, 2009-cu ildə dövlət qeydiyyatından keçmiş “Kamil Vətəndaş” Maarifləndirmə Mərkəzi Gəncəbasar bölgəsinin ən fəal qeyri-hökumət təşkilatlarından biridir.
Modern.az
