Türkiyədə keçirilən prezident seçkisinin ardından müxalifətdəki qalmaqal böyüyür. Ana müxalifət partiyası olan CHP prezident seçkisindəki məğlubiyyətin acısını partiya sədri Kamal Kılıçdaroğlundan çıxmaq istəyir.
Modern.az saytı “Milliyet”ə istinadən xəbər verir ki, CHP-nin keçmiş başqanı, millət vəkili Dəniz Baykal da dolayısı ilə Kamal Kılıçdaroğlu əleyhinə ifadələr işlədib.
Biləcik vilayətindəki çıxışı zamanı CHP-lilərə səslənən Dəniz Baykal bildirib ki, partiya daxilində problemlər var. O, CHP-nin qurultayında yeni sədr seçməyə işarə edərək belə deyib:
“Partiyanın problemləri, çətinlikləri var, onları danışmaq istəmirəm. Bunları düzəldə biləcək bir axtarışa başlayın. Qarşıdan partiyanın qurultayı gəlir. Qurultay prosesində xətası olmayan və gələcəkdə də olmayacaq ümidini verən yeni bir rəhbərliyi iş başına gətirin. Biz keçmiş CHP-ni görmək istəyirik”.
Qeyd edək ki, Türkiyədə avqust ayının 10-da keçirilən prezident seçkisində baş nazir Rəcəb Tayyib Ərdoğan qələbə qazanıb. Türkiyə ana müxalifəti seçkiyə vahid namizədlə qatılmışdı. CHP və MHP-nin vahid namizədi İslam Əməkdaşlıq Təşkilatının keçmiş baş katibi Ekmelleddin İhsanoğlu idi.
Modern.az
