Lisey və gimnaziyaların I sinfinə elektron qəbul başlayıb. Bakı şəhəri üzrə Təhsil İdarəsindən Modern.az-a verilən məlumata görə, martın 15-dən etibarən valideynlər (və ya qanuni nümayəndə) Bakı şəhərində yerləşən ümumtəhsil məktəbləri ilə yanaşı elektron sistem vasitəsilə qəbulu müsabiqə əsasında aparılan müəssisələr, lisey və gimnaziyalara da müraciət edə bilirlər.
Belə ki, Bakı şəhəri üzrə I sinfə qəbul müsabiqə əsasında aparılan müəssisələrə, lisey və gimnaziyalara qeydiyyat elektron formada martın 15-dən aprelin 15-dək, seçim üçün müsabiqələr (imtahanlar) isə aprelin 15-dən mayın 15-dək həyata keçiriləcəkdir. Müsabiqənin nəticələrinə görə, həmin lisey və gimnaziyalara qəbul edilməyən uşaqların valideynləri (digər qanuni nümayəndələri) elektron sistemdə yenidən ümumtəhsil məktəbi seçmək hüququna malikdirlər. Ümumtəhsil məktəblərinin I siniflərinə qəbul üçün valideynlərin (digər qanuni nümayəndələrin) elektron ərizələrinin bu sistemdə qeydiyyatı www.mektebeqebul.edu.az saytı vasitəsilə aparılır. Qeyd edək ki, Azərbaycan Respublikasının Təhsil Nazirliyi 2015/2016-cı tədris ilindən etibarən ilk olaraq Bakı şəhərində fəaliyyət göstərən ümumtəhsil məktəblərinin, lisey və gimnaziyaların I siniflərinə uşaqların qəbulunda optimal və səmərəli icra mexanizmi yaratmaq məqsədilə həmin prosesin elektron sistem vasitəsilə həyata keçirilməsini qərara almışdır.Valideynlər aşağıda adları qeyd edilən lisey və gimnaziyalara elektron müraciət edə bilərlər:
“Ankara məktəbi” məktəb lisey
BSU Məktəb Lisey Kompleksi
Bülbül adına orta ixtisas musiqi məktəbi
Bakı Avropa liseyi
Heydər Əliyev adına lisey
T.İsmayılov adına 6 nömrəli məktəb-lisey
İ.Hacıyeva adına “Tərəqqi” liseyi
132-134 nömrəli təhsil kompleksi
İ.Əfəndiyev adına Elitar Gimnaziya
“Zəngi” liseyi
Milli Konservatoriyanın tərkibində Respublika İncəsənət gimnaziyası
Humanitar Fənlər təmayüllü məktəb-lisey
23 nömrəli tam orta məktəb
287 nömrəli Zəkalar liseyi
291 nömrəli Ekologiya liseyi
160 nömrəli Klassik Gimnaziya
Modern.az
