Xaçmazda fəaliyyət göstərən RTV telekanalı Sumqayıtın “Dünya” TV kanalını plagiatlıqda suçlayıb. RTV-dən Modern.az-a saytına bildirilib ki, regional televiziyaların ölkədə daha çox tamaşaçı kütləsinə yetişə bilmədiyi dönəmlərdə dəfərlərlə bu kanalın baxımlı telelayihələri digər telekanallar tərəfindən mənimsənilib.
”Sırf RTV-yə məxsus verilişlərin ideya və mövzularının digər telekanallar tərəfindən oğurlanması faktları dəfələrlə baş verib. Məqsədimiz bu faktalara yenidən qayıtmaq deyil.
İndi isə, RTV-nin ən baxımlı telelayihələrindən biri bütövlükdə başqa kanal tərəfindən oğurlanıb. Həm də bu oğurluq təkcə layihənin ideyası, adının mənimsənilməsi ilə yekunlaşmır. “Dünya” TV heç bir tərəddüd etmədən RTV-nin 5 mövsüm efirdə yayımlanmış məşhur “Unudulmayan ifalar” verilişinin adını, RTV tərəfindən hazırlanan videobaşlıqları, hətta, RTV əməkdaşları tərəfindən səsləndirilmiş hazır materialları da özününküləşdirərək efirdə yayımlayır”.
RTV bəyan edib ki, “Dünya” TV-nin atdığı bu addım nəinki peşəkarlıq, hətta heç bir etik kriteriyaya sığmır. “RTV-nin “Unudulmayan ifalar” verilişi ötən mövsüm “Azerspace-1” peyki vasitəsilə yayımlanan Region TV-nin efirində tamaşaçılara təqdim olunub. Verilişdə bütün gücünü Azərbaycan incəsənətinə sərf etməklə xalqını sevdirən, tanıdan 200-dən artıq incəsənət fədaisinin həyat və yaradıcılığına işıq salınıb. Hazırda isə “Unudulmayan ifalar” verilişi təhrif olunaraq həftənin bazar ertələri “Dünya” TV-də yayımlanır”.
RTV müqayisə üçün özünün “Unudulmayan ifalar” verilişinin xalq artisti Mobil Əhmədovun yaradıcılığına həsr olunmuş sayı ilə eyni verilişinin “Dünya” TV tərəfindən təhrif olunmuş formasını təqdim edib.
