“Hacıbala Abutalıbov təhsillə bağlı adamdır. Mən onun fikri ilə tanış deyiləm. Yəqin ki, anlaşılmazlıq olub. Düşünürəm ki, bu işdə heç bir problem olmayacaq”. Modern.az xəbər verir ki, bu sözləri təhsil naziri Mikayıl Cabbarov Hacıbala Abutalıbovun 20 saylı məktəbin ərazisində park salınması ilə bağlı açıqlamasına münasibət bildirərkən deyib. O qeyd edib ki, 20 saylı məktəbin eskizi Azərbaycanın mövcud qanunvericiliyinə uyğun olaraq təsdiqlənib:
“İşlər qrafikə uyğun aparılsa, 20 saylı məktəbin tikintisinin 2016-2017-ci ildə başa çatdırılması planlaşdırılır. Bakı şəhər İcra Hakimiyyəti son illərdə onlarla məktəb tikib. Həmin məktəblərdə paytaxtda yaşayan on minlərlə şagird təhsil alır. Paytaxt sakini olaraq o şagirdlərin adından Hacıbala Abutalıbova təşəkkürümü bildirirəm”.
Məktəbin tikinti layihəsinin eskizi artıq Bakı Şəhər İcra Hakimiyyəti tərəfindən təsdiq olunub.
Təhsil naziri qeyd edib ki, 20 saylı məktəbdə təhsil alan şagirdlər iki ayrı məktəbə yerləşdirilib: “20 saylı məktəb respublikada ən böyük məktəblərdən biridir. Orada 3000-ə yaxın şagird oxuyur, 110-dan çox sinif var. Bir neçə innovativ, o cümlədən elektron tədrisi və təhsili tətbiq edən mexanizmlər 20 saylı məktəbdə tədris olunur. Çox böyük olduğuna görə orada təhsil alan şagirdləri iki ayrı məktəbdə yerləşdirə bilmişik”.
Mikayıl Cabbarov onu da vurğulayıb ki, kolleclərin ali təhsil müəssisələrinin tərkibinə qatılması prosesi tədricən həyata keçiriləcək:
“Bu proses bütün kolleclərə şamil edilmir. Əvvəlcə Azərbaycan Maliyyə-İqtisad Kollecinin Azərbaycan Dövlət İqtisad Universitetinin tərkibinə verilməsi təklif edilib. Daha sonra Bakı Dövlət Rabitə və Nəqliyyat Kollecinin Azərbaycan Texniki Universitetinin tərkibinə verilməsi nəzərdə tutulur”.
Modern.az
