“Bu gündən sınaq müddəti başa çatan 3 qatar Həzi Aslanov - İçərişəhər stansiyaları istiqamətində öz qrafiki üzrə işləyir. Bu qatarlar daimi xəttə olacaq”.
Bu barədə Modern.az saytına “Bakı Metropoliteni” Qapalı Səhmdar Cəmiyyətinin mətbuat xidmətinin rəhbəri Nəsimi Paşayev məlumat verib. O qeyd edib ki, hazırda istismar müddətini başa vuran qatarlar olmadığından xətdən çıxarılanlar da yoxdur. Nəsimi Paşayev yeni qatarların xəttə buraxılması ilə intervalda hər hansı dəyişiklik edilməyəcəyini də vurğulayıb: “Qatarların intervalla əlaqəsi yoxdur.
Saatda 30 cüt qatar müəyyən olunan qrafik və xətt üzrə hərəkət edir. İnterval bundan artıq qatarın xəttə buraxılmasına imkan vermir. Nəzərinizə çatdırım ki, qatarlar səhər saat 06:00-dan axşam saat 00:00-a qədər fasilələrlə xəttə çıxır. Hər bir qatarın öz saatı var. Ona görə də yeni qatarların xəttə buraxılması hər hansı problem yaratmayacaq”.
Bakı Metropoliteni imzalanmış müqavilələrə əsasən, 5 vaqondan – 2 ədəd 81-760B modelli motorlu baş vaqondan, 2 ədəd 81-761B modelli motorlu aralıq vaqondan və 1 ədəd 81-763B modelli motorsuz vaqondan ibarət 3 qatar alıb. Birbaşa keçidi olan vaqonlar 81-760A/761A/763A vaqonlarından ön hissəsi, salonların interyeri və başqa cür boyanması ilə fərqlənir.
Alınan qatarlar texniki innovasiyalar baxımından 4-cü nəslə mənsubdur. Bu nəsil qatarların idarə edilməsi mikroprosessor əsasında həyata keçirilir.
Əvvəlki nəsil qatarlardan fərqli olaraq, yeni qatarların dartı mühərrikləri dəyişən cərəyanla işləyir. Yeni nəsil vaqonların banı paslanmayan metaldandır və bu qatarlarda əvvəlkilərdən fərqli olaraq vaqonlararası birbaşa keçid var. Bütün vaqonlarda daha mükəmməl havalandırma sistemi quraşdırılıb. Vaqonların salonunda “hərəkətli sətir” sistemi və təhlükəsizliyin təmin edilməsi üçün müşahidə kameraları qoyulub.
Yeni nəsil vaqonların tutumu 330 sərnişin təşkil edir. Köhnə vaqonlarda isə bu rəqəm 308 idi. Bu texniki göstəricilərdən göründüyü kimi, müasir tələblərə cavab verən yeni qatarlar ən mütərəqqi texnologiyaya, idarəetmə üsuluna malik olmaqla, sərnişinlərin rahat və təhlükəsiz daşınmasını yüksək səviyyədə təmin edəcək.
Gülşən RAUFQIZI
