Dövlət Sərhəd Xidməti (DSX) 2015-ci ilin may ayı ərzində dövlət sərhədini pozduqları üçün 37 nəfəri saxlayıb. DSX-nın mətbuat xidmətindən Modern.az-a verilən məlumata görə, onların 24 nəfəri Azərbaycan, 3-ü Özbəkistan, 3-ü İran, 2 nəfəri Rusiya, hər ölkədən bir nəfər olmaqla Türkiyə, Gürcüstan, Qırğızıstan, Moldova və Litva vətəndaşları olub.
Məlumatda qeyd edilir ki, sərhəd rejim qaydalarını pozarkən yaşıl sərhəddə 9 nəfər, Xəzər dənizində 32 nəfər saxlanılaraq barələrində müvafiq tədbir görülüb.Cinayətkarlığa qarşı mübarizə tədbirləri nəticəsində hüquq-mühafizə orqanları axtarışda olan 411 nəfər aşkarlayaraq aidiyyəti orqanlara təhvil verib. Narkotik vasitələrin qanunsuz dövriyyəsinə qarşı mübarizə tədbirləri nəticəsində 33 kiloqram 323,6 qram narkotik maddənin dövlət sərhədindən keçirilməsinin qarşısı alınıb.
Qaçaqmalçılıqla mübarizə çərçivəsində həyata keçirilən tədbirlər nəticəsində ümumi dəyəri təqribən 444 min manat olan qaçaqmalın, o cümlədən 1 ədəd pnevmatik tapança, 1 ədəd travmatık tapança, travmatık tapança üçün 7 ədəd patron və 1 ədəd daraq, 3 ədəd 7,62 mm-lik patron, 1,5 kq barıt, 1 ədəd beşbarmaq, 500 ABŞ dolları, 1.228.000 rus rublu, 550 manat, 500 İran rialı, 774 qram qızıl-zinət əşyaları, 1 ədəd mühərrik, 5 ədəd qayıq, 800 metr tor, 132 ədəd mobil telefon, 1566 ədəd 600 qramlıq mühərrik yağı, 28 ədəd peyk antenasının aksessuarları, 7910 qutu müxtəlif markalı siqaret, 149 ədəd müxtəlif spirtli içkilər, 36 kq parfümeriya məmulatı, 327 ədəd müxtəlif dərman preparatları və digər istehlak malları saxlanılıb.
Modern.az
