“Bakı şəhəri üzrə yaşayış təyinatlı daşınmaz əmlak bazarında vəziyyəti qənaətbəxş hesab etmək olmaz. Torpaq sahələrinin qiymətində kəskin ucuzlaşma müşahidə olunmasa da, mənzil bazarında son 3 ayda 15 faizdən artıq qiymət azalması müşahidə olunub”.
Bu fikirləri ekspert Ramil Osmanlı Modern.az-a açıqlamasında deyib. O bildirib ki, neftin qiymətinin azalması amili istehlak bazarında proseslərin qeyri-müəyyənliklə müşahidə olunmasına zəmin yaradır:
“Bu proses daşınmaz əmlak subyektlərinə aid olan bazar predmetlərinə təsir göstərir. Torpaq bazarında kəskin qiymət dəyişməsi, dinamikanın azalması müşahidə olunur. Adətən, hər il bu vaxtlar torpaq bazarında canlanma, alqı-satqı artırdı. Bu il bu prosesdə də durğunluq var.
Bu, daha çox əlində nağd vəsaiti olan insanların hələ ki bazarda baş verən iqtisadi proseslərlə bağlı gözləmə mövqeyində dayanması ilə bağlıdır. Prosesin nə qədər davam edəcəyini indidən proqnozlaşdırmaq çətindir. İyun ayının monitorinqləri tamamlanmadığı üçün indidən nəticə söyləmək mümkün deyil. Hazırkı şəraitdə daşınmaz əmlak bazarında müsbət dəyişiklik müşahidə olunmur”.
Ekspertin fikrincə, kirayə bazarında qiymət artımı üçün xarakterik dövr deyil:
“Adətən, bu dövrdə kirayə bazarında təklif çoxalmağa başlayır. Çünki bu mövsümdə regionlardan gəlib təhsil alan tələbələr yaşadığı rayona qayıdırlar. İndiki halda kirayədə hansısa aktivlik barədə danışmaq tezdir. Proseslər iyul ayının sonlarına doğru aktivləşə bilər. Bu da yəqin ki, qiymətdə özünü göstərəcək”.
Yeni tikilən binalara nisbətdə köhnə mənzillərin qiymətinin ucuz olduğu deyilir. Bu ehtimallar reallığı nə dərəcə əks etdirir?
Ekspert bunu ilkin bazarda evlərin qiymətlərinin ucuzlaşmamasının başlıca səbəbini bu sahənin tikinti şirkətlərinin rəhbərlərinin nəzarətində olması ilə əlaqələndirib:
“Sahibkarın kənar maliyyə resursları tükənir, bazarda dayanma imkanı məhdudlaşır, əlavə öhdəliklərinin sayır artır. Sahibkar bu halda məcbur olub qiyməti azaldır, yaxud əlindəki mənzili təcili satmaq üçün müxtəlif yollar axtarır. Hazırda yeni tikilən binalarda bu proses müşahidə olunmur.
Bu səbəbdən də qiymətdə ciddi dəyişiklik yoxdur. Mənzil bazarında tələb və təkliflin strukturundan asılı olaraq qiymət dəyişikliyi baş verir. Bu səbəbdən də qiymətin azalması müşahidə olunur. Yəqin ki, bu proses iyul ayında da davam edəcək”.
Yeganə OQTAYQIZI
