Azərbaycan Respublikası təhsil nazirinin 2015-ci il 8 iyun tarixli əmri ilə 2015-2016-cı dərs ilindən 10-11 siniflərdə tədrisin təmayüllər üzrə təşkil olunacağı təhsil müəssisələrinin siyahısına Bakı, Gəncə, Sumqayıt, Mingəçevir və Şirvan şəhərlərində yerləşən 50 məktəbin adı əlavə olunub və 4 təmayül (texniki, riyaziyyat-iqtisadiyyat, humanitar, təbiət) istiqamət üzrə tədris planları təsdiq edilib. Tədris planlarında informatika fənninin olmaması məsələsinə Təhsil Nazirliyi belə açıqlama verib.
Nazirliyin mətbuat xidmətinin rəhbəri Cəsarət Valehov
Modern.az-a açıqlamasında bildirib ki, təmayülləşmə 10-11-ci sinifləri əhatə edir. “Burada İnformatika dərsinin ləğvindən söhbət getmir. Təmayül məktəblər əvvəllər olduğu kimi 18 fənn deyil, 9 fənni əhatə edir. Burada həm də məktəblər kollektivinə seçim imkanı verilir”.
C.Valehov qeyd edib ki, əgər doğurdan da həmin məktəb üçün təmayül istiqaməti üzrə hər hansı fənn daha seçimlidirsə, o zaman məktəbin pedoqoji kollektivi qərar verməkdə sərbəstdir. “Elə təmayülləşmənin fəlsəfəsi də bundan ibarətdir. O ki qaldı informatika fənninin tədrisinə, bu fənn məktəblərdə 1-ci sinifdən keçirilir”.
Qeyd edək ki, 2015-2016-cı dərs ilindən 10-11 siniflərdə tədrisin təmayüllər üzrə təşkil olunacağı təhsil müəssisələrində tədris olunacaq fənlərin sayı texniki fənlər təmayüllü siniflərdə 9, riyaziyyat-iqtisadiyyat və humanitar fənlər təmayüllü siniflərdə 8, təbiət fənləri təmayüllü siniflərdə 10-dək azaldılıb. Təmayül istiqamətindən asılı olmayaraq, tədris planlarında Azərbaycan dili (rus bölməsində rus dili), xarici dil, ədəbiyyat, riyaziyyat, Azərbaycan tarixi, fiziki tərbiyə, gənclərin çağırışaqədərki hazırlığı fənləri saxlanılır.
Aytən ƏLİYEVA
