Futbolçu Cavid Hüseynovun dostları tərəfindən döyülərək Kliniki Tibbi Mərkəzə yerləşdirilən, lakin orada əməliyyat edildikdən dərhal sonra vəfat edən jurnalist Rasim Əliyevlə bağlı yeni açıqlama yayılıb. Mərhumu əməlyyat edən professor Saday Əliyev Modern.az saytına göndərdiyi açıqlamada bildirib:
“Son günlər sosial şəbəkələrdə mərhum jurnalist Rasim Əliyevin ölümü ilə əlaqədar çoxsaylı məlumatlar dərc olunur. Bu məlumatların bir çoxu birmənalı olaraq obyektiv faktlara əsaslandırılmayan “kütlə emosiyası”, populist çıxışlar və böhtan xarakteri daşıyır. Məsələnin məğzindən xəbəri olmayan bəzi insanlar hadisəyə sərbəst, iradi, tərəddüdsüz və birmənalı subyektiv münasibət bildirirlər. Məlumat üçün bir daha xatırladıram ki, mənim mərhum Rasim Əliyevin nə xəstəxanaya qəbulundan nə onun müayinəsindən və nəzarət olunmasından xəbərim olub və bu proseslərdə iştirak etməmişəm. Onun valideynlərini tanımıram, görməmişəm. Mənə yalnız məsul cərrah xəstəni təcili əməliyyat etməyi həvalə etdi və xəstəni mən yalnız əməliyyat stolunda görmüşəm. Vəssalam.
Lakin qeyd etməliyəm ki, əməliyyat zamanı aydın oldu ki, xəstə bədənin hər tərəfini əhatə edən çoxsaylı, ağır travma almışdır. Nəticədə xəstənin daxili orqanları əksəriyyəti parçalanmış, cırılmış, funksiyasını itirmişdir. Travmanın xarakteri, daxili orqanların vəziyyəti və əməliyyat barədə mən məlumat vermişəm.
Qeyd etməliyəm ki, alınmış bədən xəsarəti ağır kateqoriyaya aiddir (döş qəfəsinin və qarın nahiyəsinin müştərək travması, qabırğalarının çoxsaylı sınıqları, ağ ciyərin əzilməsi, dalağın partlaması, mədəaltı vəzinin cırılması).
Əməliyyatın həcmi travmanın xarakterinə uyğun olmuşdur. Lakin çox təəssüf ki, xəstəni xilas etmək mümkün olmadı. Xəstənin ölümü hər bir cərrah üçün dərin psixoloji şok, mənəvi travmadır. Allah ona rəhmət eləsin.
Bu hadisənin ən çox narahatlıq törədən tərəflərindən biri də odur ki, sosial şəbəkələrdə birmənalı olaraq xəstənin cərrahların səhvi nəticəsində ölməsi fikri iddia edilir. Bu vəziyyətdən istifadə edən insanlar məsələyə dəxli olmayan və tamamilə böhtan və şantaj xarakterli daşıyan məlumatlarla çıxış edirlər.
Məsələn şikayətçi Natiq Abdullayev iddia edir ki, guya atası da mənim icra etdiyim əməliyyat nəticəsində ölmüşdür(2014 –cü il).Bu məlumat tamamilə səhv və böhtandır. Mən xəstəni məsul cərrah kimi qəbul etmişəm, diaqnozu dəqiqləşdirmişəm lakin mənim nəzarətim altında digər cərrahlar onu əməliyyat etmişlər. Bu fakt Natiq Abdullayevə heç bir əsas vermir ki, guya mən xəstəni əməliyyat etməkdən imtina etmişəm. Mən məsul cərrah, professor kimi işin təşkilinə cavabdehlik daşımışam. Bəzi insanlar xəstəxanaların daxili iş prinsipləri barədə tam diletant olduqları halda, cərrəhın fəaliyyətinin ciddi məqamlarını tam sərbəstiliklə müzakirə etməyə girişirlər. Hərə bir versiya irəli sürür, hərə bir mülahizə yürüdür və dedikləri fikir barədə heç bir hüquqi məsuliyyət daşımırlar. XXI əsr “Linç Məhkəməsi ” qurmaq dövrü deyildir!
N.Abdullayevin nəzərinə çatdırıram ki, onun rəhmətlik atası heç də keçirilmiş cərrahi əməliyyatdan yox, ağ ciyər vərəm xəstəliyinin ağırlaşması nəticəsində ölmüşdür.
Təəssüf hissi doğuran odur ki, N.Abdullayevin doğma atasının sağlamlıq vəziyyəti barədə məlumatı olmamışdır. Bəzi insanların bu cür “ psixoloji affekt (oyanma) ” xarakteri daşıyan çıxışları bir növ səsi eşidən, lakin onun haradan gəldiyini bilməyən insanın hərəkətinə bənzəyir. Bir nəfər emosional vəziyyətdə əsassız və böhtan xarakterli məlumat verir, işin əsasından məlumatsız kütlə onu təkrar edir. Bu cür insanlar heç də mərhumun və onun ailəsinin halına yanmaq hissi ilə yox, özlərinə sərf edən, böhtan, qərəzçilik və şantaj xarakteri daşıyan “ajiotaj” yaratmaq mövqeyi ilə çıxış edirlər.
Mən belə insanları obyektivliyə, ədalətə və şəffaflığa çağırıram. Biz sivil qanunlar əsasında inkişaf edən ölkədə yaşayırıq. Ona görə də populistik və ucuz effekt xarakteri daşıyan çıxışlardan, emosiyalardan uzaq olmaq lazımdır.
Mən bir daha mərhum Rasim Əliyevin ailəsinə və qohumlarına dərin hüznlə başsağlığı verirəm, Allahdan onlara səbr diləyirəm. Allah rəhmət eləsin.
Professor Əliyev S.A
13.VIII.2015”.
