Bu gün İctimai TV-də parlament seçkiləri ilə bağlı təşkil edilmiş debatlarda iştirak etmək üçün 40 saylı Kəpəz (Gəncə) ikinci seçki dairəsindən, 15 saylı Yasamal birinci, 103 saylı Gədəbəy seçki dairəsi, 111 saylı Zaqatala-Balakən seçki dairəsi üzrə qeydiyatdan alınmış namizədlər efirdə olacaqlar.
Modern.az-ın məlumatına görə, bu günkü efirin “favoriti” 15 saylı Yasamal birinci seçki dairəsi olacaq. Canlı efirdə Yasamal seçki dairəsindən Müsavat başqanı İsa Qəmbər, VİP sədri Əli Əliyev, “Lider TV”-dən Etibar Hüseynov, AMİP sədrinin müavini Elşən Mustafayev, “Azadlıq aşiqi” Nemət Pənahlı, mərhum Əbülfəz Elçibəyin keçmiş köməkçisi Ülvi Həkimov, hakim partiyanın namizədi, İctimai-Siyasi Unversitetin rektoru Rasim Nəbiyev olacaq.
40 saylı Kəpəz seçki dairəsindən isə “İnsan Naminə”, “İslahat”, “Qarabağ” blokundan, KXCP, DADP namizədləri olacaq.
İTV-də həmçinin 103 saylı Gədəbəy və 111 saylı Zaqatala-Balakən seçki dairəsindən qeydə alınmış namizədlər də çıxış edəcək. Bunların içində tanınmışlardan keçmiş millət vəkili Nizami Quliyev, hazırkı deputatlar Dünyamin Xəlilov, Musa Quliyev də var.
Modern.az
