“EL” hərəkatının lideri Eldar Namazov müxalifət qüvvələrinin dünən elan etdiyi Milli Şuranın perspektivlərini açıqlayıb. Modern.az-ın məlumatına görə, bu gün “Azadlıq” radiosunun “İşdən sonra” verilişinin qonağı olan E.Namazov Milli Şuranın tərkibində 100-dən çox tanınmış şəxsin yer aldığını bildirib.
“Milli Şuranın siyahısı yaxın günlərdə açıqlanacaq. İlk olaraq onu deyə bilərəm ki, Milli Şuranın say tərkibi 100-dən çoxdur”.
E.Namazovun fikrincə, Milli Şura təkcə Azərbaycanda deyil, dünyanın müxtəlif ölkələrində fəaliyyət göstərəcək.
“Milli Şura təkcə Azərbaycanda deyil, dünyanın bir çox ölkələrində fəaliyyət göstərəcək. Amerikada, Kanadada, Rusiyada, Türkiyədə, Belarusda və eləcə də digər ölkələrdən yaşayan azərbaycanlılardan ibarət xüsusi qruplarımız formalaşıb. Biz bu barədə artıq razılığa da gəlmişik”,-deyə Namazov bəyan edib.
E.Namazov həmçinin AMİP və digər müxalifət partiyalarının Milli Şurada təmsil olunmamasının səbəblərini açıqlayıb.
“Sözün açığı elə partiyalar var ki, biz onlarla danışıqlar aparmırdıq. Bu inamla bağlı olan məsələdir. AMİP-ə də təklifimiz olmuşdu. Biz onlara vaxt verdik ki, fikirləşsinlər. Amma onlar bizə nə “hə” dedilər, nə də “yox”. Biz də israr etmədik”.
“El” rəsmisi Milli Şuranın Rusiyaya bağlı olması haqda yayılan xəbərlərə də münasibət bildirib.
“Rüstəm İbrahimbəyovun Amerikada da, Moskvada da, Bakıda da evi var. O dünya vətəndaşıdır. Rüstəm müəllimin Rusiyanın adamı olması haqda xəbərlər absurddur. Mənim haqqımda da gah deyirlər ki, guya Amerikanın adamıyam, gad da Rusiyanın. Bunlar absurddur”.
Daha sonra E.Namazov Milli Şuranın prezident seçkilərində iştirakı ilə bağlı sualı cavablandırıb. O qeyd edib ki, seçkilərdə Milli Şura üzvlərindən biri namizəd olaraq iştirak edəcək.
Anar RÜSTƏMOV
