Məşhur bakılı həndbolçusu, hazırda Rusiyada yaşayan Stella Vartanyan Azərbaycanla bağlı xatirələrini bölüşüb.
Modern.az saytı Rusiya KİV-nə istinadən xəbər verir ki, erməni əsilli idmançı gəncliyində Bakının “Avtomobilçi” klubundakı çıxışını xatırlayıb.
“Sovet dövründə Azərbaycan SSR-in paytaxtında qadın həndbolu çox populyar idi. Yerli “Avtomobilçi” klubu yüksək liqada layiqli mübarizə aparmaqla yanaşı, medallara da iddialı olurdu. Düzdür, Kiyev “Spartak”ı ilə rəqabət çətin olsa da, 9 gümüş və 7 bürünc medal bakılılar tərəfindən qazanılmışdı”.
Bakıdakı 277 saylı uşaq-gənclər idman məktəbində 10 il (1977-1987) həndbol hazırlığı keçən Stella Vartanyan 1990-cı ilə qədər yerli “Avtomobilçi” klubunda çıxış edib.
Lakin Azərbaycanla Ermənistan arasında gərginlik yarandıqdan sonra Stella Vartanyan Rusiyanın Volqoqrad şəhərinə köçüb və öz idman karyerasını burada davam etdirib.
Stella Vartanyan 1970-ci il dekabrın 9-da Bakıda anadan olub.
O müxtəlif illərdə həndbol üzrə tələbələr arasında dünya çempionu, 3 qat Rusiya çempionu, Avropa Superkubokunun sahibi olub.
Hazırda bakılı həndbolçu beynəlxalq dərəcəli hakim kimi fəaliyyət göstərir.
Vüqar İsmayılov
