“Azərbaycan Respublikasının 2023-cü il dövlət büdcəsi haqqında” qanun layihəsi birinci oxunuşda qəbul edilib.
Modern.az xəbər verir ki, qanun layihəsi bu gün Milli Məclisin plenar iclasında müzakirəyə çıxarılıb.
Müzakirələrdən sonra büdcə layihəsi ilk oxunuşda qəbul olunub.
"Azərbaycan Respublikasının 2023-cü il dövlət büdcəsi haqqında" qanun layihəsinə əsasən, 2023-cü il üçün dövlət büdcəsinin gəlirləri 30,7 milyard manat proqnozlaşdırılır, bu da ölkə tarixinin ən yüksək göstəricisi olmaqla, 2022-ci illə müqayisədə 5,2 faiz, 2021-ci illə müqayisədə isə 16,4 faiz çoxdur.
Bundan əlavə, 2023-cü ildə dövlət büdcəsinin xərcləri 33,3 milyard manat proqnozlaşdırılır ki, bu da 2022-ci illə müqayisədə 1,0 milyard manat, 2021-ci illə müqayisədə isə 5,9 milyard manat çoxdur. 2023-cü ilin dövlət büdcəsinin gəlirləri kimi xərcləri də ölkə tarixinin ən yüksək göstəricisidir.
Onu da xüsusilə qeyd edək ki, bugünkü iclasda parlament tarixində ilk dəfə olaraq çıxışa yazılmış deputatların hər birinə söz verilib, onlar müvafiq təkliflərini səsləndiriblər.
