Türkiyənin xarici işlər naziri Mövlud Çavuşoğlu "Kanal V"yə müsahibəsində müxalifətin prezidentliyə namizədi Kemal Kılıçdaroğlunun "Türk yolu" layihəsini tənqid edib.
Modern.az xəbər verir ki, o, Kılıçdaroğlunun Azərbaycan meqalayihələrdən kənarda qoyduğunu bildirib.
Çavuşoğlu qeyd edib ki, Türkiyə illərdir Azərbaycanla bir çox layihə həyata keçirib.
O vurğulayıb ki, Orta Dəhliz daha da gücləndiriləcək: “Mərkəzi Asiyanı Türkiyəyə bağlayan Orta Dəhlizi inkişaf etdirəcəyik. Kılıçdaroğlunun Azərbaycanı kənarda qoyduğu layihələrdəki kimi deyil, bu günə qədər inşa etdiyimiz dəmir yolu və avtomobil yolu, eləcə də enerji boru xətləri ilə yaratdığımız layihələrlə Orta Dəhlizi daha da gücləndirəcəyik”.
Nazir deyib ki, Türkiyə Qarabağın işğaldan azad edilməsində Azərbaycana hər cür dəstək verib: "Kılıçdaroğlu isə deyir ki, biz sırf Azərbaycana dəstək vermişik. İndi soruşuram: “Biz Azərbaycana deyil, Ermənistana dəstək verməli idik?".
