Gəncə Dövlət Universitetinin əməkdaşlıq etdiyi ali təhsil ocaqlarından biri də İstanbul Universitetidir. Adı çəkilən universitet ilə əməkdaşlıq əlaqələrinin qurulması hələ 2016-cı ilə təsadüf edir. Belə ki, 2016-cı ildə İstanbul Universitetinin rektoru Mahmut Ak və Gəncə Dövlət Universitetinin rektoru Yusif Yusibov tərəfindən universitetlər arasında 5 il müddətinə Anlaşma Memorandumu imzalanıb. 2022-ci ildə yenidən imzalanan müqavilənin müddəti 2027-ci ilin sonuna qədər artırılıb. Qeyd edək ki, ötən dövr ərzində hər iki universitet tərəfindən birgə online formatda elmi konfranslar təşkil edilib, müxtəlif layihələr həyata keçirilib.
Gəncə Dövlət Universitetinin Türkiyə universitetləri ilə əməkdaşlıq əlaqələri bu gün də uğurla davam etdirilir, elm və təhsilə dair müxtəlif proqramların tətbiq edilməsi üçün mühüm işlər görülür. Qardaş ölkənin universitetləri ilə qarşılıqlı əməkdaşlıq əlaqələri sayəsində Gəncə Dövlət Universitetində Türk dünyasının görkəmli şəxsiyyəti Yunus Əmrə adına mühazirə otağı, Türkiyədə isə dahi Azərbaycan şairi Nizami Gəncəvi adına mühazirə zalı açılıb.
44 günlük Vətən müharibəsi zamanında da qardaş ölkənin universitetləri Azərbaycanın yanında olmuş, biganə qalmayaraq öz mənəvi dəstəklərini göstərmişlər. Belə ki, II Qarabağ müharibəsi zamanı Nişantaşı Universitetinin rektoru Şenay Yalçın və İstanbul Universitetinin rektoru Mahmut Ak nümayəndə heyəti ilə birgə Gəncə şəhərinə gələrək öz dəstəklərini göstərmişlər. 2020-ci ilin Vətən müharibəsi günlərində Gəncə Dövlət Universiteti ilə Nişantaşı Universiteti və İstanbul Universiteti Gəncənin Ermənistan tərəfindən dəfələrlə raket atəşinə tutulmasını qətiyyətlə pisləyən birgə bəyanat imzalayaraq dünyanın 70-dən çox ictimai təşkilatına yaymışlar. Bütün bunlar isə universitetlər arasında əlaqələrin daha da möhkəmlənməsinə səbəb olmuşdur.
Mövcud olan elmi əməkdaşlığı daha da gücləndirmək məqsədilə 13 dekabr 2024-cü il tarixdə Gəncə Dövlət Universitetinin rektoru Yusif Yusibov və nümayəndə heyəti Türkiyəyə işgüzar səfəri çərçivəsində İstanbul Universitetində olub. Ali təhsil ocağının rektoru Osman Bülent Zülfikar ilə görüş zamanı hər iki universitet arasında illərə söykənən elmi əməkdaşlıq əlaqələrindən, Türkiyə və Azərbaycan arasında qardaşlıq münasibətlərindən danışılıb. Gələcəkdə təhsil və elmi tədqiqatlar sahəsində əməkdaşlığın davam etdirilməsi, tələbə və müəllimlərin mübadiləsi, eləcə də birgə elmi tədqiqatlar və konfransların təşkil olunması məsələsi müzakirə olunub. Nəzərdə tutulan layihələr və birgə təşkil ediləcək konfranslar haqqında danışılıb. 2025-ci ilin may ayında Ulu Öndər Heydər Əliyevin anadan olmasının 102-ci ildönümünə həsr ediləcək elmi konfransın İstanbul Universiteti, Dokuz Eylül Universiteti və Gəncə Dövlət Universiteti ilə birgə təşkilinə dair müzakirələr edilib.
İstanbul Universitetinin rektoru Osman Bülent Zülfikar Gəncə Dövlət Universiteti ilə qurulmuş əməkdaşlıq əlaqələrindən məmnun qaldığını və bu fəaliyyətlərin gələcəkdə də davam etdirilməsinə dəstək göstərəcəyini bildirib.
Görüşün sonunda tərəflər bir-birinə simvolik hədiyyələr təqdim edib və xatirə şəkli çəkdirib.
