Şanlı Azərbaycan Ordusunun Qarabağı, Gündoğar Zəngəzuru azad etməsi, son 30-40 ilin deyil, son 100-110 ilin də deyil, ən azı 200 ilin danılmazmı-danılmaz, möhtəşəmmi-möhtəşəm, hadisə kimi hadisəsidir! 

Tarixi Zəfərimiz həm hərbi, həm də diplomatik müstəvidə Azərbaycan xalqının suverenliyini təsdiqləyən əvəzolunmaz uğurumuzdur!

Bu uğurlar və qarşı sətirlərdəki vurğularımız, liderin ölkə taleyindəki yerini və rolunu yalnız təriflə deyil, faktlarla, gerçək nəticələrlə təsdiqləyir. Qarabağ Zəfəri, Azərbaycanın tarixi yaddaşını canlı saxlayan rəmzlərlə bərabər, həm də xalqın milli ruhunu və özünəinamını gücləndirir. 
Gücün - Yer üzünün ən ədalətli və humanist Dəmir Yumruğunun yiyəsinin tarixi Zəfərə gələn uğur yolunu, başarı xəritəsini, onun adgünündə, yığcam şəkildə yada salaq: 

Qaradağ

Azərbaycan Prezidenti İlham Əliyev vaxtilə Qaradağdan Millət vəkili seçilmişdi – Qaradağlıların bu seçimi rayonun sosial-iqtisadi inkişafına güclü təkan vermiş oldu. İlham Əliyevin Qaradağa qazandırdıqları bu gün də örnək, model olaraq öyrənilməyi haqq edir;

Onun təşəbbüsü ilə Qaradağın sosial-iqtisadi inkişafı üçün atılan uğurlu addımlar, ardınca (özəlliklə enerji siyasəti sahəsində) əldə edilən digər uğurlar, yalnız bir rayonun, bir sektorun deyil, ümumilikdə iqtisadiyyatımızın inkişafına, Azərbaycanın rifahına xidmət edir.

Qara qızıl

İlham Əliyev SOCAR-ın birinci vitse-prezidenti kimi qara qızıl təsərrüfatının səmərəli idarə edilməsinə təkan verdi, daha sonra ölkənin Baş naziri və Prezidenti kimi bu siyasəti, digər əməli çalışma aahələri üzrə də davam və inkişaf etdirdi. 
Eyni zamanda, Milli Olimpiya Komitəsinin prezidenti və beynəlxalq qurumlarda yüksək vəzifələrdə çalışaraq Azərbaycanın beynəlxalq arenadakı nüfuzunu artıran da İlham Əliyev oldu.

Qaraşəhər… Ağşəhər…

İlham Əliyev paytaxtın Qaraşəhər adlanan bölgəsinin Ağşəhərə çevrilməsi prosesini başa çatdırdı.
Qaraşəhərin Ağşəhərə çevrilməsi Azərbaycanın iqtisadi və mədəni tərəqqisinin göstəricisidir. 
Bu, yalnız bir şəhərin deyil, bütün ölkənin yenilənməsini simvollaşdırır.
İlham Əliyev bu bölgəyə, səmtə (də) yeni ünvanlar qazandırdı. Onun Ali Baş Komandanlığı ilə qazanılmış Zəfərin şərəfinə adlandırılan 8 Noyabr prospekti, Hərbi Qənimətlər Parkı məhz Xətai rayonunda - Qaraşəhər səmtində açıldı. 
İlham Əliyev Qaraşəhərdə ağ abidə ucaltdı.
Qarabağ Zəfərinin şərəfinə açılan, 44 metr hündürlüyə malik və 44 sütundan ibarət abidə, Azərbaycanın Zəfər tarixini əbədiləşdirən simvoldur. Bu abidə, yalnız yaxın keçmişə işıq salmır, eyni zamanda gələcək nəsillərə qürur və ruh verir. 

Bəli, 

Qaraşəhər və Ağşəhər metaforaları təkcə rəng dəyişimini deyil, böyük dönüşü, yenilənməni və inkişafa doğru atılan addımları ifadə edir. Bu metaforalar kiminə görə, emosional ritorika olaraq qəbul görər bəlkə; amma biz bunu, Azərbaycanın keçmiş çətinliklərini geridə qoyaraq, güclənmiş mövqeyinin nümayişi kimi görürük.

Bəli, 

Qaradağı da, Qarabağı da (hər birini öz planında) qaranın ən müsbət anlamı ilə Böyüdən, Böyük edən, kiçik Qaraşəhəri böyük Ağşəhərə çevirən o oldu.
Qarabağda ölkəmizin üzünü ağ edən, şanımızı ucaldan, düşməni ağ bayraq qaldırmağa vadar edən şanlı ordunun Müzəffər Ali Baş Komandanından danışırıq! 
O, ümumilikdə, ölkəni qaramatdan xilas edib!

DÖVLƏTİMİZ ZAVAL GÖRMƏSİN!

 

Əkbər QOŞALI