Rusiya prezidenti Vladimir Putin və Ermənistanın baş naziri Nikol Paşinyan telefon danışığı zamanı Ermənistanın Kollektiv Təhlükəsizlik Müqaviləsi Təşkilatı (KTMT) çərçivəsindəki fəaliyyətini müzakirə etməyiblər.
Modern.az xəbər verir ki, bunu Rusiya prezidentinin mətbuat katibi Dmitri Peskov bildirib.
“Prezident və baş nazir arasında son telefon danışığı zamanı bu mövzu müzakirə olunmayıb”, - Peskov deyib.
Bu gün Ermənistan Xarici Kəşfiyyat Xidməti öz hesabatında İrəvanın KTMT-də iştirakının dondurulması üçün əsasların bu il aradan qalxacağını çətin hesab edib.
Peskov onu da qeyd edib ki, Ermənistan hələ KTMT-dən çıxmaq niyyətini açıqlamayıb.
“KTMT öz effektivliyini və aktuallığını sübut edən müstəqil, yetkin bir təşkilatdır. Bunun üzərində iş davam edir. İndiyədək Ermənistan bu təşkilatdan çıxmaq niyyətini bəyan etməyib”, – Peskov bildirib.
