Avropa İttifaqı (Aİ) ölkələrinin səfirləri bu gün Brüsseldə qurumun Ermənistandakı müşahidəçi missiyasının müddətinin uzadılmasını müzakirə edəcəklər.
Modern.az xəbər verir ki, “Azadlıq” radiosunun məlumatına görə, son dəqiqə sürprizləri olmasa, səfirlər Aİ müşahidəçilərinin daha iki il, 2027-ci il fevralın 19-dək Ermənistanda qalmasına imkan verəcək layihəni təsdiq edəcəklər.
Qərar layihəsinə əsasən, müşahidəçilərin tərkibi və sayı dəyişməz qalacaq:
165 beynəlxalq və 44 erməni müşahidəçi.
Rəsmi açıqlamaya görə, missiyanın müşahidə zonası Naxçıvan bölməsi də daxil olmaqla, bütün Ermənistan-Azərbaycan sərhədi boyunca uzanır.
Xatırladaq ki, Azərbaycanla Ermənistan arasında müzakirə olunan sülh sazişi layihəsində razılaşdırılmayan maddələrdən biri sərhəddəki üçüncü qüvvələrlə bağlıdır. Azərbaycan Prezidenti İlham Əliyev dəfələrlə bildirib ki, Avropa müşahidəçiləri sərhəd bölgəsindən çıxarılmalıdır.
