Gürcüstan parlamentinin 49 üzvünün deputat səlahiyyətlərinə xitam verilməsi məsələsinə baxılıb.
Modern.az xəbər verir ki, parlamentin Prosessual məsələlər komitəsi üç müxalifət partiyasından olan deputatlar barədə müvafiq rəyi yekun qərar qəbul edilməsi üçün plenar iclasa tövsiyə edib. Bunlar “Güclü Gürcüstan”, “Dəyişiklik üçün Koalisiya”, “Birlik – Milli Hərəkat” partiyalarıdır.
Mərkəzi Seçki Komissiyasının yekun protokoluna əsasən, 2024-cü il oktyabrın 26-da keçirilən seçkilərin yekunlarına görə, “Güclü Gürcüstan” 14, “Dəyişiklik üçün Koalisiya” 19, “Birlik – Milli Hərəkat” isə 16 mandat alıb.
“Gürcüstan Naminə Qaxariya Partiyası”nın da parlamentdə 12 mandatı var. Giorgi Qaxariyanın siyasi birliyi digər partiyalar kimi oktyabrın 26-da keçirilən seçkiləri qeyri-legitim elan edib, lakin öz deputatlarının səlahiyyətlərinə xitam verilməsi ilə bağlı bəyanat imzalamayıb.
Xatırladaq ki, “Dəyişiklik naminə”, “Güclü Gürcüstan” və “Birlik – Milli Hərəkat” koalisiyaları siyahıların geri götürülməsi tələbi ilə Mərkəzi Seçki Komissiyasına müraciət etmişdilər.
