Bu gün “Mənim Azərbaycanım” məktəbinin şagirdlərinin iştirakı ilə “Sehrli xalat” filminin motivləri əsasında hazırlanmış film-tamaşanın təqdimatı keçirilib.

Modern.az xəbər verir ki, bu barədə "canazerbaijan.com" məlumat yayıb.

Riçmond Hilldəki "Cosmo Music"də keçirilən tədbiri giriş sözü ilə Azərbaycan Evinin direktoru Lalin Həsənova açıb.

O, qonaqlara Kanadadakı Azərbaycan Evinin nəzdində yaradılan “Mənim Azərbaycanım” məktəbi barədə məlumat verilib və cəmi 12 ay fəaliyyət göstərməsinə baxmayaraq sözügedən məktəbin şagirdlərinin dəfələrlə professional səhnələrdə cıxiş etdiyini vurğulayıb. Bunun birliyin, gərgin əməyin və professionallığın nəticəsi olduğunu qeyd edən L.Həsənova tamaşanın hazırlanmasında əməyi keçən komandanı səhnəyə dəvət edib. Daha sonra film-tamaşanın ssenari müəllifi, “Mənim Azərbaycanım” məktəbinin Azərbaycan dili və drama müəllimi Sevinc Quliyeva filmin araya-ərsəyə gəlməsi barədə danışıb. Filmin rejissoru Elçin Muxtarov tamaşada iştirak edən uşaqların istedadlı olduğunu və balacalarla işləməkdən zövq aldığını dilə gətirib.

Daha sonra filmin balaca aktyorları səhnədə yer aldılar. Balaca aktyorlara sertifikat və onları həvəsləndirmək üçün rəmzi olaraq “Oskar” mükafatı” verilib. Aktyorların təqdimatından sonra qonaqlar “Sehrli xalat” film-tamaşasını seyr ediblər.

Sonda tədbirin fəxri qonağı əməkdar elm xadimi, Humboldt mükafatı alan ilk azərbaycanlı professor Məsud Əfəndiyev çıxış edib. O, balaca aktyorların performansını bəyəndiyini bildirdi. Qeyd etdi ki, 60 il əvvəl sözügedən filmə baxıb. Professor adət-ənənələrimizin, milli musiqimizi və rəqslərimizin, hətta milli xörəklərimizin filmdə yer almasını xüsusi qeyd edib. M.Əfəndiyev filmdə qoyulan mövzuların bu günlə səsləşdiyini, xüsusilə də elmlə bağlı hissələrin qabardılmasını yüksək qiymətləndirdiyini vurğulayıb.

Sonda qonaqlar çay süfrəsi arxasında film-tamaşanı müzakirə ediblər.