Özünü qondarma “Artsaxın prezidenti” adlandıran Samvel Şahramanyan Ermənistan parlamentinin sədri Alen Simonyandan Qarabağdan köçən ermənilərdən üzr istəməyi tələb edib.
Alen Simonyan dünən erməniləri Qarabağda qalıb sonadək döyüşməməkdə, qaçmaqda günahlandırmışdı.
Samvel Şahramanyana cavab verən Ermənistan parlamentinin sədri deyib ki, o, Qarabağı necə tərk etdiyini açıqlasaydı, yaxşı olardı.
Simonyan deyib ki, o, “Qarabağdan qaçanlar” deyərkən Xankəndidə oturub Ermənistanda malikanə tikdirənlərdən, gələcək görmədikləri üçün Qarabağda deyil, kənarda biznes quran konkret insanlardan bəhs edib.
“Sizi əmin edirəm ki, haqqında danışdığım insanlar bunu özləri də anlayıblar”, - o, jurnalistlərə deyib.
"Vaxtı gələndə ad çəkəcəm, amma ad çəkməyə ehtiyac yoxdur. Deyirəm ki, bu adamlar ilk gündən Qarabağı viran etmək istəyirdilər, posta əsgər qoyub deyirlər ki, "sən müdafiə edirsən, biz də gedirik"... Mənim xalqla nə işim var, siyasətçiləri nəzərdə tuturam", - deyə Alen Simonyan vurğulayıb.
