“Tarixi Zəfərimizin, ərazi bütövlüyümüzün və suverenliyimizin reallıqları fonunda işğaldan azad edilmiş bütün torpaqlarımızda genişmiqyaslı bərpa-quruculuq işləri həyata keçirilir. Dövlət başçısı İlham Əliyevin yeni ilin əvvəlində ənənəvi olaraq yerli televiziya kanallarına müsahibəsi digər sahələr kimi, bu istiqamətdə də görülən işlərin yekunu, qarşıda dayanan vəzifələrin, çağırışların təqdimatı kimi dəyərləndirilir. Ölkə Prezidenti bu ilin 7 yanvar tarixində yerli televiziya kanallarına müsahibəsində son üç ildə 10 yaşayış məntəqəsinə keçmiş köçkünlərin qaytarıldığını, on mindən çox köçkünün artıq evlərlə təmin edildiyini və orada yaşadığını önə çəkərək bu hədəfi açıqladı ki, 2025-ci il üçün planda daha 20-yə yaxın yaşayış məntəqəsinə keçmiş köçkünlərin qaytarılması nəzərdə tutulur.
44 günlük İkinci Qarabağ müharibəsində şanlı Qələbəmizdən dərhal sonra başlanan bərpa-quruculuq işlərinin miqyası bu gün qayıdış ünvanlarının, həmçinin bura qayıdan köçkünlərin say tərkibində özünün aydın ifadəsini tapır. Böyük Qayıdış Proqramına uyğun olaraq, 2022-ci ilin iyul ayında Zəngilanın Ağalı kəndinə başlanan köç prosesi hazırda azad olunmuş digər ərazilərdə uğurla davam edir. Artıq Zəngilanın Ağalı kəndi ilə yanaşı, Ağdərə rayonunun Talış kəndində, Füzuli, Şuşa, Laçın, Cəbrayıl və Xocalı şəhərlərində, Laçın rayonunun Sus, Zabux, Xocalı rayonunun Ballıca kəndlərində on mindən çox keçmiş məcburi köçkün evlərlə təmin edilib. Qürurvericidir ki, son dörd ildə dövlət büdcəsindən vəsaitin ayrıldığı sahələr sırasında azad edilmiş ərazilərdə bərpa-quruculuq işləri xüsusi yer tutur. Bu il bu məbləğ 4 milyard manatdır. Ümumilikdə 2020-ci ildən başlayaraq 2025-ci il də daxil olmaqla dövlət büdcəsindən bərpa-quruculuq işlərinə 22 milyard manata yaxın vəsait ayrılıb. Azərbaycanın iqtisadi və maliyyə imkanları hər bir hədəfə zamanında və yüksək səviyyədə nail olmağa stimul verir. Dövlət başçısı İlham Əliyevin işğaldan azad edilmiş ərazilərə hər bir səfəri bu mühüm məqamların təqdimatında əhəmiyyətli rol oynayır”.
Bu fikirləri Modern.az-a Milli Məclisin deputatı Malik Həsənov bildirib.
Deputat qeyd edib ki, Prezident İlham Əliyevin təkcə fevralın 18-də işğaldan azad edilmiş Ağdam rayonuna, onun ardınca fevralın 19-da Xankəndi şəhərinə, Xocalı rayonuna səfərləri çərçivəsində aparılan işlərlə tanışlığına, eyni zamanda, açılışında iştirak etdiyi sosial obyektlərə diqqət yetirmək kifayətdir: “Belə ki, dövlət başçısı İlham Əliyev və birinci xanım Mehriban Əliyeva fevralın 18-də Ağdam şəhərində “Hilton Garden İnn” hotelində, Muğam Mərkəzində, 1267 mənzilli 2-ci yaşayış kompleksində, 1 nömrəli tam orta məktəbdə, 1 nömrəli körpələr evi-uşaq bağçasında aparılan tikinti işləri, 209 mənzilli “Ağdam Residence” yaşayış kompleksində yaradılan şəraitlə, Əsgəran qala-kompleksinin konsepsiya layihəsi ilə tanış oldular. Fevralın 19-da Prezident İlham Əliyev Xankəndi şəhərində “Bulud” hotelinin açılışında iştirak etdi, Azərbaycan-Özbəkistan birgə müəssisəsi olan Xankəndi tikiş fabriki ilə tanış oldu, Zəfər parkının təməlqoyma mərasimi keçirildi. Xocalının Ballıca kəndində fərdi evlərin və infrastrukturun bərpası sahəsində görülən işlərlə tanış olan dövlət başçısı İlham Əliyev kəndə köçən bir qrup sakinlə görüşdü”.
Malik Həsənov vurğulayıb ki, Xocalı rayonunun Ballıca kəndinin timsalında bərpa-quruculuq işlərinin aydın mənzərəsini təqdim etmək mümkündür: “Ballıca kəndi bərpa edilən və keçmiş köçkünlərin qayıtdığı 10-cu yaşayış məntəqəsidir. Artıq burada 500-ə yaxın insan yaşayır. Bu gün bölgəni, bu yerləri görməyən balaca uşaqlar, gənclər həvəslə qayıdırlar, işləyirlər, qururlar, yaradırlar. Bu, bir daha xalqımızın nə qədər yüksək mənəvi keyfiyyətlərə malik olduğunu göstərir. Sakinlərlə görüşdə cənab İlham Əliyev bu məqamı böyük qürur hissi ilə vurğuladı ki, keçmiş köçkünlər hər ay hissə-hissə, qrup-qrup öz dədə-baba torpaqlarına qayıdırlar. Böyük Qayıdış Proqramı icra edilir. Demək olar ki, vaxtilə işğal altında olan bütün torpaqlar bərpa edilir. Bütün Qarabağ, Şərqi Zəngəzur dirçəlir və hər gün bunu əyani şəkildə görürük”.
Millət vəkili qeyd edib ki, 2023-cü ilin sentyabr ayında həyata keçirilən bir günlük antiterror tədbirləri nəticəsində suverenliyimizin tam bərpasından sonra Xankəndidə, Xocalıda, Ağdərədə, Xocavənddə qısa müddətdə görülən işlərin miqyası olduqca böyükdür: “Ötən il 28 May-Müstəqillik Günündə Xocalı şəhəri sakinlərinə qovuşdu. Dövlət başçısı İlham Əliyev və birinci xanım Mehriban Əliyeva Xocalı şəhərinə köçən sakinlərlə görüşüb onlara evlərin açarlarını təqdim etdilər. Həmin görüşdə Böyük Qayıdış proqramının Xocalı səhifəsinin yazıldığını bildirən dövlət başçısı İlham Əliyev belə bir əminliyi də ifadə etdi ki, yaxın gələcəkdə digər xocalılılar da böyük həvəslə buraya qayıdacaqlar. Xocalı faciəsindən, insanlığa qarşı törədilən cinayətdən bəhs edən cənab İlham Əliyev xocalılıların faktiki olaraq müstəqilliyin bütün illərini başqa-başqa yerlərdə, o cümlədən Ağcakənd kəndində keçirməli olduqlarını bildirdi. O da qeyd edildi ki, birinci köçkün qəsəbəsi məhz Ağcakənd qəsəbəsində xocalılılar üçün Ulu Öndər Heydər Əliyevin iştirakı ilə salınmışdır. O vaxtdan bu günədək nə qədər gözəl tarix yazıldı. Qarabağ tam azad olundu. 44 günlük İkinci Qarabağ müharibəsi başa çatanda xocalılılar inanırdılar ki, bu gün də gələcək”.
Malik Həsənov bildirib ki, qısa zamanda azad edilmiş ərazilərimizdə görülən işlər, soydaşlarımızın mərhələ-mərhələ dogma yurd-yuvalarına qayıdışı Böyük Qayıdış Proqramının birinci mərhələsinin uğurla başa çatacağından xəbər verir. Bütün işlər ardıcıllıqla həyata keçirilir. Bərpa olunan şəhər və kəndlərimiz sakinlərini gözləyirlər.
