“Azərbaycanın ikitərəfli əməkdaşlığa verdiyi önəm qarşılıqlı səfərlərin dinamikliyi fonunda özünün aydın ifadəsini tapır. Bu gün ölkə mətbuatında əsas müzakirə mövzularından biri Pakistanın Baş naziri Məhəmməd Şahbaz Şərifin ölkəmizə rəsmi səfəridir. Təbii ki, səfər başa çatsa da müzakirə olunan məsələlər, əlaqələrin inkişafında hüquqi baza rolunu oynayan sənədlərin imzalanması, səfərin əhəmiyyətini, perspektivləri açıqlayan mətbuata bəyanatda səsləndirilən çağırışlar və sair diqqətdən kənarda qala bilməz. Prezident İlham Əliyev Pakistanın Baş naziri Məhəmməd Şahbaz Şərif ilə təkbətək və geniş tərkibdə görüşlər keçirdi, strateji tərəfdaşlıq səviyyəsinə yüksələn münaibətlərimizin gələcəyinə xidmət edəcək mühüm məsələlər ətrafında fikir mübadiləsi apardı, mətbuata birgə bəyanatlarında qarşılıqlı etimada əsaslanan əlaqələrimizin daha da möhkəmlənməsində hər iki tərəfin maraqlı olduğu qeyd olunaraq hədəflər diqqətə çatdırıldı. Ümumilikdə, Azərbaycan-Pakistan münasibətləri dostluq və qardaşlıq prinsiplərinə söykənir. Cənab İlham Əliyevin səfər çərçivəsində keçirdiyi geniş tərkibdə görüşdə qeyd etdiyi kimi, Pakistan ilə Azərbaycan arasında bu cür qardaşlıq münasibətlərini görmək iki qardaş müsəlman ölkəsi arasında tərəfdaşlığın yaxşı nümunəsidir. Beynəlxalq təsisatlarda hər zaman bir-birimizi dəstəkləyirik, ölkələrimizin ərazi bütövlüyünə, suverenliyinə güclü dəstək veririk və qarşımızda çox geniş sərmayə gündəliyi dayanır. Münasibətlərimiz nəinki xalqlarımız, o cümlədən təmsil etdiyimiz regionlar üçün həqiqətən vacibdir”.
Bu fikirləri Modern.az-a Milli Məclisin deputatı Malik Həsənov bildirib.
Malik Həsənov qeyd edib ki, Pakistan Azərbaycanın müstəqilliyini tanıyan ilk dövlətlərdən biridir: “Bu mühüm məqam iki ölkə arasında formalaşan sıx münasibətlərin başlanğıcı kimi dəyərləndirilir. Həmin dövrdən etibarən Bakı ilə İslamabad arasında strateji tərəfdaşlıq sürətlə inkişaf etməyə başladı, dövlətlərarası münasibətlər qarşılıqlı hörmət və etimad prinsipləri əsasında daha da möhkəmlənir. İki ölkə arasında təmasların qurulmasında, möhkəm təməlin yaradılmasında Ümummilli Lider Heydər Əliyevin rolu böyükdür. Onun 1996-cı ildə dost və qardaş ölkəyə rəsmi səfəri iki ölkə arasında əlaqələrin gələcək inkişafı üçün mühüm amil oldu. Son 21 ildən artıq dövrdə Heydər Əliyev siyasətini uğurla davam etdirən Prezident İlham Əliyev iki ölkə arasında əlaqələrin daha da inkişafı istiqamətində davamlı addımlar atır. Təkcə tarixi Zəfərimizdən sonra iki ölkə arasında münasibətlərin inkişafında yeni səhifə açan qarşılıqlı səfərlərin say tərkibinə diqqət yetirmək kifayətdir. Dövlət başçısı İlham Əliyev ötən il Pakistanda dövlət səfərində oldu. Bu səfərin əhəmiyyətini təsdiqləyən mühüm amillərdən biri əməkdaşlığın müxtəlif sahələrini əhatə edən 15 sənədin imzalanması oldu. Ötən il, eyni zamanda, Azərbaycanın ev sahibliyi etdiyi, iqlim diplomatiyasında dönüş nöqtəsi kimi dəyərləndirilən COP29 tədbiri çərçivəsində Prezident İlham Əliyev ilə Pakistanın Baş naziri Məhəmməd Şahbaz Şərifin görüşü oldu. Hazırkı dövrün əsas çağırışı olan yaşıl enerji sahəsində əməkdaşlıq müzakirə edilən əsas məsələrdən biri idi. Onu da qeyd edək ki, Pakistanın Baş nazirinin bu günlərdə ölkəmizə reallaşdırdığı səfər zamanı imzalan 10 sənədin əksəriyyəti iki ölkənin enerji şirkətləri arasında oldu. Əməkdaşlıqda iqtisadi amil əsasdır”.
Millət vəkili vurğulayıb ki, davamlı təmaslarımız iki qardaş ölkə arasında daha sıx tərəfdaşlıq münasibətlərinə zəmin yaradır: “Dövlət başçısı İlham Əliyevin qeyd etdiyi kimi, dinamika ölkələrimiz arasında münasibətləri əks etdirir. Ökələrimizin suverenliyi və ərazi bütövlüyü məsələsində bir-birimizə qarşılıqlı surətdə dəstək veririk, beynəlxalq təsisatlarda fəal əməkdaşlıq edirik və iştirak etdiyimiz bütün beynəlxalq təşkilatlarda daim bir-birimizi dəstəkləyirik.
Ölkələrimiz Birləşmiş Millətlər Təşkilatı, İslam Əməkdaşlıq Təşkilatı , Qoşulmama Hərəkatı və digər beynəlxalq təşkilatlar çərçivəsində bir-birini dəstəkləməkdə davam edir. Ötən ilin sonunda Azərbaycan Pakistanın da üzv olduğu İqtisadi Əməkdaşlıq Təşkilatı (D-8) ailəsinə qoşularaq, bu qurum çərçivəsində iqtisadi əlaqələrini daha da genişləndirmək imkanı əldə etdi. Ölkəmizin D-8-ə üzvlüyü Pakistan da daxil olmaqla, digər üzv ölkələrlə ticarət, investisiya və iqtisadi əməkdaşlıq sahələrində yeni perspektivlər açıb”.
Malik Həsənov diqqəti dost Pakistanın 44 günlük İkinci Qarabağ müharibəsi zamanı Azərbaycana mənəvi və siyasi dəstəyinə yönəldib: “Bu dəstək qardaşlıq münasibətlərinin ən yüksək səviyyədə olduğunu göstərdi. Müharibə dövründə Pakistan rəsmiləri Azərbaycanın haqq işini açıq şəkildə müdafiə edərək, Ermənistanın təcavüzkar siyasətini qətiyyətlə pislədilər. Həmçinin Pakistan parlamenti Azərbaycanın suverenliyini və ərazi bütövlüyünü tam şəkildə dəstəkləyən rəsmi bəyanatlar qəbul etdi. Pakistanın siyasi rəhbərliyi müharibədən sonra da Azərbaycana dəstəyini davam etdirir, azad olunmuş ərazilərin yenidən qurulması prosesinə töhfə vermək niyyətini ifadə edib. Bu, təkcə iki dövlət arasındakı dostluğun deyil, həm də iqtisadi və strateji əməkdaşlığın yeni mərhələyə qədəm qoymasının göstəricisidir. Azərbaycan-Pakistan münasibətləri strateji tərəfdaşlıqla məhdudlaşmır, eyni zamanda, qardaşlıq və qarşılıqlı etimada əsaslanan bir dostluq nümunəsini təqdim edir. Münasibətlərimizin gələcək inkişafı üçün geniş imkanlar yaranır”.
Millət vəkili bildirib ki, Azərbaycanla Pakistan arasında hərbi sahədə də əməkdaşlıq strateji tərəfdaşlıq səviyyəsinə yüksəlib və daim inkişaf etməkdədir: “Sözügedən səfər çərçivəsində təkbətək və geniş tərkibdə görüşlərdə, mətbuata bəyanatda dövlət başçısı İlham Əliyev diqqəti bu sahədə əməkdaşlığa yönəldərək bildirdi ki, Azərbaycan Pakistandan müdafiə sənayesinin istehsal etdiyi avadanlığı artıq alıb və onun keyfiyyətindən çox razıyıq, birmənalı olaraq, bu işi davam etdirəcəyik. Eyni zamanda, müdafiə sənayesi məhsullarının birgə istehsalı imkanları müzakirə edildi. Bu, əməkdaşlığımızın digər mühüm sektoru olacaq. Pakistanın çox inkişaf etmiş müdafiə sənayesi var. Azərbaycan da öz potensialını inkişaf etdirir. Ölkəmiz müdafiə sənayesinin məhsullarını artıq 30-dan çox ölkəyə ixrac edir. Bu əminlik də ifadə edildi ki, birgə istehsal ilə ixracyönümlü təchizat daha da artacaq”.
Malik Həsənov vurğulayıb ki, hər iki ölkənin birgə atdığı addımlar regionda və dünyada sabitliyə töhfə verəcək. Pakistanın Baş naziri Məhəmməd Şahbaz Şərif iki dost ölkənin münasibətlərinin gələcəyini belə xarakterizə etdi: “Bizim dostluğumuz, qardaşlığımız Ərəb dənizinin isti sularından Xəzər dənizinə kimi uzanır. Biz birgə səylərimizlə bunu möhkəmləndirəcəyik, gücləndirəcəyik və bu qardaşlıq dünya var olduqca yaşayacaq”.
