Bu ilin fevral ayında Bakıda mənzillərin qiymətləri yanvar ayı ilə müqayisədə artdığı bildirilir.

Mövzu ilə bağlı Modern.az-a danışan əmlak məsələləri üzrə ekspert Ramil Qasımzadə bildirib ki, daşınmaz əmlak bazarında ciddi qiymət artımı müşahidə olunmur:

“Sadəcə ipoteka predmeti olan bəzi mənzillərdə müvəqqəti artım müşahidə olunur. İpoteka üçün müraciətlərin çoxalması burada rol oynayır. Qiymətlər ipoteka verilişinin dayandırılmasından sonra yenidən əvvəlki səviyyəsinə qayıdacaq. Artım bir o qədər deyil, bəzi seqmentlərdə olan artımları ümumi daşınmaz əmlak bazarında artım kimi xarakterizə etmək düzgün deyil”.

Gələcək aylarda qiymət artımı ipotekaya yararlı olan mənzillərdə ola bilər:

“Amma limit başa çatandan sonra həmin qiymətlər yenidən azalacaq. Məsələn Xətai rayonunda 150 min manat dəyəri olan evi bəzi işbazlar fürsətdən istifadə edib 170 min manata təklif edirlər. Yaxud 120-130 min manat aralığında olan evlər 140-150 minə təklif olunur. Bazarda qiyməti spekulyativ şəkildə artırırlar. Burada həm də rieltorların da rolu var. Onlar bilir ki, ipotekaya görə, bazara alıcı kütləsi daxil olur. Bu da müvəqqəti xarakter daşıyır. İpoteka limiti başa çatandan sonra qiymətlər əvvəlki səviyyəsinə qayıdacaq. Hələlik ipotekadan başqa qiymət artımı üçün səbəb yoxdur. İpotekaya yararlı olan mənzillərdə isə qiymətlər stabil olaraq qalır”.